FAO va Yevropa Ittifoqi Oʻzbekistondagi kimyoviy laboratoriyalar uchun oʻquv dasturini ishga tushirdi

Toshkent, O’zbekiston (UzDaily.uz) — Birlashgan Millatlar Tashkilotining Oziq-ovqat va qishloq xo‘jaligi tashkiloti (FAO) tomonidan Yevropa Ittifoqi moliyaviy ko‘magida amalga oshirilayotgan “Xavfli kimyoviy moddalarni samarali boshqarish uchun texnik ko‘maklashish” loyihasi doirasida bugun Ekologik monitoring milliy markazi mutaxassislari uchun laboratoriya sifat boshqaruvi va xavflarni baholashga bag‘ishlangan to‘rt kunlik o‘quv dasturi boshlandi.

Trening xalqaro laboratoriya mutaxassisi Mohammad Nazem Shirazi tomonidan olib borilmoqda va u kimyoviy tahlil hamda pestitsid qoldiqlarini aniqlash bo‘yicha milliy laboratoriya salohiyatini mustahkamlashga qaratilgan to‘rtta moduldan iborat dasturining birinchi bosqichi hisoblanadi.

O‘quv dasturi ikki asosiy yo‘nalishni qamrab oladi: kimyoviy tahlil laboratoriyalarida xavflarni aniqlash va baholash hamda ISO/IEC 17025:2017 xalqaro standarti talablariga muvofiq sifat boshqaruvi tizimlarini joriy etish va akkreditatsiyaga tayyorgarlik. Mazkur standart sinov va kalibrlash laboratoriyalarining malakasi va ishonchli natijalarni taqdim etish qobiliyatiga qo‘yiladigan talablarni belgilaydi.

Texnik taqdimotlar amaliy mashg‘ulotlar va real misollar bilan uyg‘unlashtirilgan holda tashkil etilgan trening ishtirokchilarga laboratoriya xavflarini boshqarish, sifat nazorati vositalarini qo‘llash hamda akkreditatsiya jarayonlariga tayyorgarlik bo‘yicha bilim va ko‘nikmalarini mustahkamlashga yordam beradi. Shuningdek, trening kimyoviy moddalar, laboratoriya uskunalari, chiqindilar bilan ishlash, ventilyatsiya tizimlari va favqulodda holatlar bilan bog‘liq kasbiy va operatsion xavflar to‘g‘risidagi xabardorlikni oshiradi hamda xavfsiz va samarali laboratoriya muhitini ta’minlash choralarini yoritadi.

Samarali laboratoriya tizimlari xavfli kimyoviy moddalarni oqilona boshqarishning muhim tarkibiy qismi hisoblanadi. Ular vakolatli organlarga pestitsid qoldiqlarini monitoring qilish, ifloslanish xavflarini baholash va inson salomatligi hamda atrof-muhitni muhofaza qilishga qaratilgan dalillarga asoslangan qarorlar qabul qilish imkonini beradi.

Mazkur faoliyat FAOning O‘zbekistonda oziq-ovqat xavfsizligi, barqaror qishloq xo‘jaligi va atrof-muhitni muhofaza qilish bo‘yicha milliy salohiyatni mustahkamlashga qaratilgan keng ko‘lamli qo‘llab-quvvatlashining bir qismi hisoblanadi. Loyiha doirasida Yevropa Ittifoqi xavfli kimyoviy moddalarni boshqarishni takomillashtirish, ekologik monitoring va pestitsidlar nazorati tizimlarini mustahkamlash uchun maqsadli texnik ko‘mak ko‘rsatmoqda.