Dilnozaxon Kattaxonova O‘zbekiston Bosh vaziri o‘rinbosari bo‘ldi

Toshkent, O’zbekiston (UzDaily.uz) — O‘zbekiston Respublikasi Prezidenti Oila va xotin-qizlar qo‘mitasi rahbariyatidagi kadrlar o‘zgarishlariga oid farmonlarni imzoladi.

Dilnozaxon Kattaxonova O‘zbekiston Respublikasi Bosh vazirining o‘rinbosari — Oila va xotin-qizlar qo‘mitasi raisi etib tayinlandi.

Yangi tayinlov munosabati bilan Dilnozaxon Kattaxonova O‘zbekiston Respublikasi Yoshlar ishlari agentligi direktori birinchi o‘rinbosari lavozimidan ozod etildi.

Prezidentning boshqa farmoni bilan Zulayho Mahkamova boshqa ishga o‘tgani munosabati bilan O‘zbekiston Respublikasi Bosh vazirining o‘rinbosari — Oila va xotin-qizlar qo‘mitasi raisi lavozimidan ozod etildi.

Amaldagi qonunchilikka muvofiq, Vazirlar Mahkamasi aʼzolari, jumladan vazirlar lavozimiga nomzodlar tayinlanishidan avval Oliy Majlis Qonunchilik palatasi deputatlari tomonidan ko‘rib chiqiladi.

Oliy Majlis Qonunchilik palatasining navbatdagi yalpi majlisida deputatlar Dilnozaxon Kattaxonovaning O‘zbekiston Respublikasi Bosh vazirining o‘rinbosari — Oila va xotin-qizlar qo‘mitasi raisi lavozimiga nomzodini ko‘rib chiqib, maʼqulladi.