Davlat aktivlari Toshkent markazidagi “TES” AJ ofisi binosini sotuvga qo‘ydi

Toshkent, O‘zbekiston (UzDaily.uz) — O‘zbekiston Davlat aktivlarini boshqarish agentligi Toshkent shahrining Chilonzor tumanida joylashgan ofis binosini sotuvga chiqardi. Bu haqdagi maʼlumot E-auksion platformasida eʼlon qilindi.

Obyekt Bunyodkor shohko‘chasi, 23-uy manzilida, «Mirzo Ulug‘bek» metro bekati yaqinida va “Bunyodkor” stadioni ro‘parasida joylashgan. Hozirgi vaqtda binoda davlat kompaniyasi — «Issiqlik elektr stansiyalari» aksiyadorlik jamiyati (“TES” AJ) faoliyat yuritmoqda.

Qo‘shimcha qurilmalari bilan birga to‘qqiz qavatli binodan iborat obyektning umumiy maydoni 7 620 kvadrat metrni, yer uchastkasi maydoni esa 0,46 gektarni tashkil qiladi. Obyekt suv taʼminoti, kanalizatsiya va elektr taʼminoti tizimlari bilan taʼminlangan, biroq gaz taʼminoti mavjud emas.

Uchastkaning boshlang‘ich narxi 191,53 milliard so‘m etib belgilangan. Auksion 2 iyul kuni soat 10:00 da bo‘lib o‘tishi rejalashtirilgan.

Sotuv shartlariga ko‘ra, balansda saqlovchi tashkilot binodan uch yil ichida chiqib ketishi shart. Shu bilan birga, Yangi Toshkentda maʼmuriy bino muddatidan oldin foydalanishga topshirilsa, obyekt belgilangan muddatdan avval xaridorga o‘tkazilishi mumkinligi nazarda tutilgan.

Uchastka 2025 yil 7 martda qabul qilingan davlat organlari binolarini xususiylashtirish to‘g‘risidagi Vazirlar Mahkamasi qarori asosida sotuvga qo‘yilgan. Ushbu qaror matni ochiq manbalarda eʼlon qilinmagan.

Avvalroq Hamkorbank Toshkent markazida joylashgan Qurilish vazirligi binosini 196 milliard so‘mga sotib olgani haqida xabar berilgan edi.

Shuningdek, islohotlar doirasida 1 iyuldan boshlab O‘zbekistonning qator shahar va tumanlarida davlat organlari yagona maʼmuriy binolarga ko‘chirilishi, bo‘shaydigan ko‘chmas mulk esa auksionlar orqali sotilishi qayd etilmoqda.