Yangi Namanganda 4 yulduzli mehmonxona qurilishi boshlandi

Toshkent, O’zbekiston (UzDaily.uz) — «Yangi Namangan» hududida 310 o‘ringa mo‘ljallangan zamonaviy 4 yulduzli mehmonxona qurilishi boshlandi. Investitsiya loyihasining qiymati 114 mlrd so‘mni tashkil etadi. Bu haqda Davlatobod tumani hokimligi axborot xizmati xabar berdi.

Tosh qo‘yish marosimida Namangan viloyati hokimi Shavkatjon Abdurazzoqov, nuroniylar, tadbirkorlar va viloyat aholisi vakillari ishtirok etdi.

Loyiha xalqaro arxitektura yechimlarini inobatga olgan holda mehmonxona qurilishini nazarda tutadi. Mehmonxonada zamonaviy xonalar, restoran, konferensiya zallari, fitnes-markaz, basseyn hamda servis infratuzilmasining boshqa obyektlari joylashtiriladi.

Yangi mehmonxona mahalliy va xorijiy mehmonlarni joylashtirish uchun sharoit yaratishi hamda Namangan viloyati turistik infratuzilmasini rivojlantirishga hissa qo‘shishi kutilmoqda.

Loyihani amalga oshirish yangi ish o‘rinlarini yaratish, xizmatlar sohasini kengaytirish, shuningdek, hududning investitsiyaviy va turistik salohiyatini oshirishni ham nazarda tutadi.