Toshkent, O’zbekiston (UzDaily.uz) — Futbol bo‘yicha 2026 yilgi jahon chempionati guruh bosqichining ikkinchi turida Chexiya va Janubiy Afrika Respublikasi terma jamoalari 1:1 hisobida durang o‘ynadi. Uchrashuv AQSHning Jorjiya shtati, Atlanta shahrida bo‘lib o‘tdi.
Chexiya terma jamoasi hisobni 6-daqiqada ochdi. Golga Mixal Sadilek mualliflik qildi. JAR terma jamoasi esa o‘yin so‘nggi qismida mag‘lubiyatdan qutulib qoldi — 83-daqiqada Teboxo Mokoyena penaltini aniq amalga oshirib, uchrashuvning yakuniy hisobini o‘rnatdi.
Uchrashuvni amerikalik hakam Tori Penso boshqardi. U erkaklar o‘rtasidagi jahon chempionati bahsida bosh hakam sifatida ishlagan tarixdagi ikkinchi ayolga aylandi. Undan avval bu natijaga 2022 yilgi jahon chempionatida Germaniya va Kosta-Rika terma jamoalari o‘rtasidagi bahsni boshqargan fransiyalik Stefani Frappar erishgan edi.
Chexiya va JAR terma jamoalari A guruhida ishtirok etmoqda. Birinchi turda Chexiya Janubiy Koreya terma jamoasiga 1:2 hisobida mag‘lub bo‘lgan bo‘lsa, JAR Meksikaga 0:2 hisobida imkoniyatni boy bergan edi.
Guruh bosqichining hal qiluvchi uchrashuvlari 25 iyun kuni bo‘lib o‘tadi. Chexiya Meksikaga qarshi maydonga tushadi, JAR esa Janubiy Koreya bilan bahs olib boradi.
