Buxoroda Telegram orqali qalbaki pul sotgan firibgar ushlandi

Toshkent, O’zbekiston (UzDaily.uz) — Buxoro viloyatida huquqni muhofaza qiluvchi organlar xodimlari tomonidan Telegram messenjeri orqali noqonuniy daromad olish sxemasini tashkil qilgan yosh yigit qo‘lga olindi.

Tergov maʼlumotlariga ko‘ra, u soxta akkauntlardan foydalanib, turli tematik guruhlarda 100 ming va 200 ming so‘mlik milliy banknotlarning yuqori sifatli “nusxalari” sotilayotgani haqida eʼlonlar joylashtirgan.

Gumonlanuvchi ehtimoliy xaridorlarni ushbu qalbaki pullar shu qadar sifatli tayyorlanganiga ishontirishga uringanki, ular bilan savdo nuqtalarida bemalol hisob-kitob qilish, shuningdek, o‘z-o‘ziga xizmat ko‘rsatish terminallari va bankomatlar orqali operatsiyalarni amalga oshirish mumkinligini taʼkidlagan.

U 100 ming so‘mlik qalbaki kupyuralar to‘plami uchun 350 ming so‘m, 200 ming so‘mlik banknotlar to‘plami uchun esa 600 ming so‘m talab qilgan. Mijozlar ishonchini oshirish maqsadida tezkor yetkazib berish xizmati ham taklif qilingan.

Mazkur sxemadan jabrlanganlardan biri Buxoro shahrida yashovchi fuqaro bo‘lgan. Qisqa yozishmalardan so‘ng sotuvchi tovarni jo‘natishdan avval to‘liq oldindan to‘lov qilish shartligini aytgan.

Fuqaro ko‘rsatilgan plastik kartaga 800 ming so‘m o‘tkazib berganidan keyin sotuvchi aloqani uzgan va xaridorni bloklab qo‘ygan. Tergov davomida maʼlum bo‘lishicha, gumonlanuvchida hech qanday qalbaki pullar bo‘lmagan. Uning butun sxemasi faqat firibgarlik va aldash usuliga asoslangan.

Tezkor-qidiruv tadbirlari natijasida gumonlanuvchining shaxsi aniqlandi. Unga nisbatan O‘zbekiston Respublikasi Jinoyat kodeksining “Firibgarlik” moddasi bo‘yicha jinoyat ishi qo‘zg‘atildi.

So‘roq jarayonida ushlangan shaxs aybini to‘liq tan olgan, aldangan fuqarolarni bloklash orqali ishlagan sxemasini batafsil tushuntirgan va qilmishidan chin ko‘ngildan pushaymon ekanini bildirgan.

U yetkazilgan moddiy zararni to‘liq qoplashga tayyorligini maʼlum qilib, ijtimoiy tarmoqlar foydalanuvchilarini o‘z xatolarini takrorlamaslikka chaqirgan.

Huquqni muhofaza qiluvchi organlar mazkur shaxsning noqonuniy harakatlaridan jabrlangan barcha fuqarolarni “112” yagona tezkor xizmat raqami orqali murojaat qilishga chaqirdi. Murojaat qiluvchilarga to‘liq maxfiylik kafolatlanishi taʼkidlandi.

Shuningdek, idora qalbaki pul belgilarini sotib olishga urinishning o‘zi ham jinoiy javobgarlikka sabab bo‘lishi va jiddiy huquqiy oqibatlarga olib kelishi mumkinligini eslatdi.