Buxoro viloyatida yangi yirik ko‘l paydo bo‘ldi

Toshkent, O‘zbekiston (UzDaily.uz) — O‘zbekistonning Buxoro viloyatida, Peshku tumanining G‘azli shaharchasidan shimoldagi hududda so‘nggi yarim yil ichida yirik suv havzasi shakllandi. O‘zbekiston Ekologik partiyasi maʼlumotlariga ko‘ra, uning paydo bo‘lishiga iqlimiy meʼyordan ancha yuqori bo‘lgan yog‘ingarchiliklar sabab bo‘lgan.

Yangi ko‘l avval suvsiz hudud hisoblangan “Sho‘rbuloq” massivi hududida paydo bo‘ldi. Uning maydoni taxminan 80 kvadrat kilometrga baholanmoqda.

Xabar qilinishicha, ko‘l o‘z ko‘lami jihatidan Buxoro shahri maydonidan ancha katta bo‘lib, mamlakatning yirik gidrologik obyektlari, jumladan Chorvoq suv ombori bilan taqqoslandi.

Mutaxassislar maʼlumotlariga ko‘ra, ko‘lning shakllanishi faqat tabiiy omillar bilan bog‘liq emas. Suv xo‘jaligi vazirligining hududda baliqchilikni rivojlantirish dasturlari doirasida kanallar qurilgan bo‘lib, ular orqali atrof hududlardan yer osti suvlari suv havzasiga yo‘naltirilmoqda.

Ko‘lni suv bilan taʼminlaydigan kollektor kanalining umumiy uzunligi taxminan 126 kilometrni tashkil etadi. Qo‘shimcha suv oqimi va kuchli yog‘ingarchiliklar birgalikda suv massasining tez to‘planishi hamda yangi suv havzasining shakllanishiga olib keldi.

Mutaxassislarning fikriga ko‘ra, cho‘l hududida bunday yirik ko‘lning paydo bo‘lishi ijobiy taʼsirlar bilan birga muayyan xavflarni ham keltirib chiqarishi mumkin. Jumladan, ekotizim va hududning suv muvozanatida o‘zgarishlar yuz berishi ehtimoli mavjud.