Braziliya, Marokash va JAR JCH pley-offiga yo‘l oldi

Toshkent, O’zbekiston (UzDaily.uz) — Futbol bo‘yicha jahon chempionatining guruh bosqichi so‘nggi turida Braziliya terma jamoasi Shotlandiya milliy jamoasi ustidan ishonchli g‘alabaga erishdi.

AQSHning Mayami shahrida bo‘lib o‘tgan uchrashuv janubiy amerikaliklar foydasiga 3:0 hisobida yakunlandi. G‘oliblar safida hujumchi Vinisius dubl qayd etib, 7-daqiqada va birinchi bo‘limga qo‘shib berilgan vaqtda gol urdi. Yana bir golga 60-daqiqada Mateus Kunya mualliflik qildi.

Ushbu bahsning eʼtiborli jihatlaridan biri Braziliya terma jamoasi tarixidagi eng yaxshi to‘purar Neymarning maydonga qaytishi bo‘ldi. U 76-daqiqada zaxiradan maydonga tushib, milliy jamoa safida 2023 yil 18 oktyabrdan buyon ilk bor o‘yin o‘tkazdi.

Mazkur g‘alaba orqali Braziliya terma jamoasi 7 ochko to‘plab, S guruhida birinchi o‘rinni egalladi. Shu guruhning parallel uchrashuvida Marokash terma jamoasi Gaiti ustidan 4:2 hisobida g‘alaba qozondi.

Marokashliklar ham 7 ochko jamg‘ardi va qo‘shimcha ko‘rsatkichlar bo‘yicha Braziliyadan ortda qolib, ikkinchi o‘rin bilan pley-offga yo‘l oldi. Qayd etish joizki, ushbu bahsda Gaiti terma jamoasi o‘z tarixida ilk bor jahon chempionati doirasidagi bir uchrashuvda ikkita gol urdi. Birinchi bo‘limdan keyin hisob 2:2 ko‘rinishida teng edi.

Avvaliga Marokash darvozaboni Yassin Bunu to‘pni o‘z darvozasiga kiritib qo‘ydi. Keyin esa Gaiti safida Moskvaning “Lokomotiv” va Sankt-Peterburgning “Zenit” klublarida to‘p surgan sobiq hujumchi Vilson Izidor gol urdi. Marokash tarkibida Ashraf Hakimi va Ismael Saybari gollar muallifi bo‘ldi, ikkinchi bo‘limda esa shimoliy afrikaliklar g‘alabani o‘z tomoniga og‘dirishga muvaffaq bo‘ldi. Shotlandiya 3 ochko bilan uchinchi o‘rinda qolgan bo‘lsa, Gaiti ochkosiz guruh jadvalini yakunladi.

Braziliya va Shotlandiya o‘rtasidagi uchrashuv natijasi Bosniya va Gersegovina terma jamoasining pley-offga chiqishini muddatidan oldin taʼminladi. Jamoa avvalroq V guruhida 4 ochko bilan uchinchi o‘rinni egallagan edi. Musobaqa nizomiga ko‘ra, har bir guruhdan ikkitadan eng yaxshi jamoa hamda uchinchi o‘rinni egallagan sakkizta eng yaxshi terma jamoa 1/16 finalga yo‘l oladi.

Shotlandiyaning yirik hisobdagi mag‘lubiyati ularni ochkolar bo‘yicha Bosniya va Gersegovinadan o‘zib ketish imkoniyatidan mahrum qildi. Natijada Bolqon vakillari o‘z tarixida birinchi marta jahon chempionatida guruh bosqichidan chiqishga erishdi. Jamoa 2014 yildagi debyut jahon chempionatida bu bosqichdan o‘ta olmagan edi.

A guruhida ham pley-off ishtirokchilari nomi maʼlum bo‘ldi. Janubiy Afrika Respublikasi terma jamoasi Txapelo Masekoning 63-daqiqada kiritgan goli evaziga Koreya Respublikasini 1:0 hisobida mag‘lub etdi. Guruhning yana bir uchrashuvida musobaqa mezbonlaridan biri bo‘lgan Meksika terma jamoasi Chexiyani 3:0 hisobida taslim qildi.

Meksika terma jamoasi 9 ochko bilan guruhda birinchi o‘rinni egalladi. Janubiy Afrika Respublikasi vakillari 4 ochko bilan ikkinchi bo‘lib, o‘z tarixida ilk bor jahon chempionati pley-off bosqichiga chiqdi. Koreya Respublikasi 3 ochko bilan uchinchi o‘rinda qoldi, Chexiya esa 1 ochko bilan guruh jadvalini yakunladi.

Pley-offning birinchi bosqichida, 29 iyun kuni Braziliya terma jamoasi F guruhida ikkinchi o‘rinni egallaydigan jamoaga qarshi maydonga tushadi. Ayni paytda ushbu o‘rin uchun Niderlandiya, Yaponiya va Shvetsiya terma jamoalari kurashmoqda.

Marokash terma jamoasi esa 30 iyunga o‘tar kechasi mazkur F guruhi g‘olibiga qarshi bahs olib boradi.

Eslatib o‘tamiz, joriy jahon chempionati AQSH, Kanada va Meksikada o‘tkazilmoqda. 48 ta milliy terma jamoa ishtirok etayotgan turnir 19 iyulga qadar davom etadi. Amaldagi jahon chempioni maqomini Argentina terma jamoasi himoya qilmoqda.