Bloger Real Sanjik besh yilga qamaldi

Toshkent, O‘zbekiston (UzDaily.uz) — Toshkentda Real Sanjik taxallusi bilan tanilgan bloger Sanjar Karimovga nisbatan hukm chiqarildi. Qaror Mirzo Ulug‘bek tumani jinoyat ishlari bo‘yicha sudi tomonidan eʼlon qilindi.

Sud Karimovni aybdor deb topib, unga besh yil muddatga ozodlikdan mahrum qilish jazosini tayinladi. U jazoni umumiy tartibdagi koloniyada o‘taydi. Shuningdek, sud qo‘shimcha ravishda 410 bazaviy hisoblash miqdorida jarima ham belgiladi.

Sanjar Karimov Jinoyat kodeksining 112-moddasi 1-qismi (o‘ldirish yoki zo‘ravonlik ishlatish bilan tahdid qilish), 168-moddasi 4-qismi (juda ko‘p miqdordagi firibgarlik), shuningdek, 273-moddasi 2-qismi (giyohvandlik vositalarini qonunga xilof ravishda tayyorlash, saqlash yoki tarqatish) bo‘yicha aybdor deb topildi.

35 yoshli avtobloger Sanjar Karimov Toshkentda firibgarlik ayblovlari bilan bog‘liq jinoyat ishida guvoh sifatida ishtirok etgan. Uning nomi turar joy uyi bilan bog‘liq bahsli bitim materiallarida tilga olingan.

Avvalroq Toshkent shahrida yashovchi Jamila Alimbayeva ijtimoiy tarmoqlarda uning oilasi firibgarlik sxemasi qurboniga aylanganini maʼlum qilgan edi. Uning 21 oktyabrdagi nashri 7,2 milliondan ortiq ko‘rishlar to‘plagan.

Uning so‘zlariga ko‘ra, kuyov Shahzod Rismatov ota-onasini uyni 12 kunga “garov” sifatida vaqtincha berishga ko‘ndirgan. Shundan keyin ko‘chmas mulk oldi-sotdi sifatida rasmiylashtirilib, ijtimoiy tarmoqlarda Real Sanjik nomi bilan tanilgan Sanjar Karimov nomiga o‘tkazilgan.

Alimbayeva oila hech qanday pul olmaganini, bitim esa boshidanoq vaqtinchalik garov sifatida tushuntirilganini aytgan. Sanjar Karimov esa uyni barcha ishtirokchilarning ixtiyoriy roziligi bilan 240 ming dollarga sotib olganini bildirgan.

Tergov maʼlumotlariga ko‘ra, Shahzod Rismatovga nisbatan bir nechta firibgarlik holatlari bo‘yicha qo‘zg‘atilgan jinoyat ishi sudga oshirilgan. 21 noyabr kuni sud uni to‘qqiz yil muddatga ozodlikdan mahrum qilish jazosiga hukm qilgan.

Jabrlanuvchi tomon advokatlari Sanjar Karimov harakatlariga huquqiy baho berish zarurligi haqida iltimosnoma kiritgan, chunki uning nomi ish bo‘yicha ko‘rsatmalarda tilga olingan. Sud iltimosnomani qanoatlantirib, holatlarni qo‘shimcha ko‘rib chiqish uchun prokurorni xabardor qilishni topshirgan.