Qatarning AL ALFIA kompaniyasi "O'zbekneftegaz" bilan hamkorlikni kengaytiradi

Toshkent, O’zbekiston (UzDaily.uz) — “O‘zbekneftgaz” AJ Boshqaruv raisi Abdug‘ani Sanginov “AL ALFIA HOLDING” kompaniyasi Direktorlar kengashi raisi vakilasi Zaynab Al-Yusuf bilan uchrashuv o‘tkazdi.

Unda tomonlar O‘zbekiston va Qatar o‘rtasidagi savdo-iqtisodiy munosabatlar izchil rivojlanayotganini alohida qayd etib, sohadagi hamkorlikni yanada kengaytirish hamda qo‘shma loyihalarni amalga oshirish istiqbollarini muhokama qildi.

Muzokaralarda “Uzbekistan GTL” bazasida lubrikantlar va surkov materiallarini mahalliylashtirish, shuningdek, favvora armaturalari ishlab chiqarishni yo‘lga qo‘yish masalalariga alohida e’tibor qaratildi.

Shu bilan birga, “AL ALFIA HOLDING” kompaniyasining “O‘zbekneftgaz” AJ tomonidan amalga oshirilayotgan istiqbolli loyihalarida ishtirok etish imkoniyatlari yuzasidan fikr almashildi.

Uchrashuv yakunlari bo‘yicha tomonlar o‘zaro manfaatli hamkorlikni yanada rivojlantirish va belgilangan yo‘nalishlarda amaliy ishlarni davom ettirishga tayyor ekanliklarini bildirdilar.