Тошкент, Ўзбекистон (UzDaily.uz) — Ўзбекистоннинг TEXNOPARK корхонаси Литвага лифтлар етказиб бериш бўйича шартнома тузди.
Литва Эстониядан кейин компания экспорт географиясидаги иккинчи Европа бозорига айланди.
Литванинг UAB Baltic Lift Service компанияси билан эришилган келишувга мувофиқ, лифт ускуналари Вильнюс шаҳридаги 17 қаватли бизнес-марказга ўрнатилади. Етказиб бериш декабрь ойининг охирига режалаштирилган.
Лойиҳа доирасида юк кўтариш қуввати 1 000 кг ва ҳаракатланиш тезлиги секундига 1,6 метр бўлган лифтлар етказиб берилади. Ускуналар CE сертификатига эга бўлиб, лифт шахтаси майдонидан янада самарали фойдаланиш имконини берувчи ёнғинга чидамли телескопик эшиклар билан жиҳозланади.
Аввалроқ TEXNOPARK Таллин шаҳрига шиша шахтали панорамали лифтлар, шунингдек, зарур металл конструкцияларни етказиб бериш бўйича ҳам шартнома тузган эди.
Литва бозорига чиқиш корхонанинг Европа мамлакатларига етказиб бериш географиясини кенгайтиради ва халқаро лифт ускуналари бозоридаги мавқеини мустаҳкамлайди.
