Тошкент, Ўзбекистон (UzDaily.uz) — Ўзбекистоннинг 15 ёшгача бўлган ўсмирлар терма жамоаси Бокуда ўтаётган FIFA U-15 World Cup & Festival 2026 мусобақасининг B даражасидаги 1/8 финал учрашувида Мадагаскар терма жамоасига 1:4 ҳисобида мағлуб бўлди. Бу ҳақда Ўзбекистон футбол ассоциацияси хабар берди.
Бунга қадар плей-оффнинг B даражасида Ўзбекистон терма жамоаси Гватемала устидан 4:1 ҳисобида ғалаба қозонган эди. Мадагаскар эса аввалги учрашувда Ироқ терма жамоасини 2:1 ҳисобида мағлуб этган.
Мусобақа тақвимига кўра, 29 октябрь куни Ўзбекистон терма жамоаси Коста-Рика терма жамоаси билан ўйнайди.
Гуруҳ босқичида Ўзбекистон терма жамоаси W гуруҳида иккинчи ўринни эгаллади. Жамоа Багама ороллари (6:1), Қозоғистон (2:0), Гуам (6:0) ва Мьянма (4:0) терма жамоаларини мағлуб этди, Ганага эса 1:4 ҳисобида ютқазди.
Мусобақа низомига мувофиқ, гуруҳ босқичидан кейин жамоалар A дан F гача бўлган даражаларда иштирокини давом эттиради. Ҳар бир даражада алоҳида ғолиб аниқланади. A даражаси ғолиби эса мусобақанинг умумий чемпиони бўлади.
Мусобақа 22–31 октябрь кунлари Бокуда ўтказилмоқда. Унда 191 мамлакатнинг ўсмирлар терма жамоалари иштирок этмоқда.
