Тошкент, Ўзбекистон (UzDaily.uz) — 2026 йилнинг январь–сентябрь ойларида Ўзбекистонда пахта ип-калаваси ишлаб чиқариш ҳажми 647 403,1 тоннани ташкил этди. 2025 йилнинг шу даврида эса 426 937,4 тонна маҳсулот ишлаб чиқарилган. Ўсиш 51,6 фоизга тенг бўлди. Бу ҳақда Ўзбекистон Республикаси Миллий статистика қўмитаси хабар берди.
Таркибида пахта толаси массаси 85 фоиз ёки ундан ортиқ бўлган пахта матоларини ишлаб чиқариш ҳажми 29,9 фоизга ошди. Кўрсаткич 72 540,9 минг квадрат метрдан 94 228,7 минг квадрат метрга етди.
Машинада ёки қўлда тўқилган трикотаж полотнолар ишлаб чиқариш 1,2 фоизга кўпайди. Мазкур маҳсулот ҳажми 59 623,0 тоннадан 60 359,6 тоннага етди.
Трикотаж ички кийимлари ишлаб чиқариш 36,1 фоизга ўсиб, 77 435,4 минг донадан 105 368,1 минг донага етди. Аксинча, трикотаж ёки тўқима устки кийимлар ишлаб чиқариш 19,5 фоизга камайди: 47 996,4 минг донадан 38 660,8 минг донага тушди.
2026 йилнинг дастлабки тўққиз ойида Ўзбекистонда саноат ишлаб чиқариши ҳажми 1 085,7 триллион сўмни ташкил этди. Бу ўтган йилнинг мос даврига нисбатан 8,1 фоизга кўпдир.
