Тошкент, Ўзбекистон (UzDaily.uz) — Ўзбекистон ва Осиё тараққиёт банки (ОТБ) тўловга қобилиятсизлик тизимини такомиллаштириш бўйича ҳамкорликнинг кейинги йўналишларини белгилашга келишиб олди.
Ҳамкорлик масалалари 2026 йил 28 октябрь куни адлия вазири ўринбосари — Тўловга қобилиятсизлик ишлари агентлиги директори Н. Муҳаммадиевнинг банк вакиллари билан учрашувида муҳокама қилинди.
Томонлар Ўзбекистондаги тўловга қобилиятсизлик тизимининг диагностик тадқиқоти натижаларини, таҳлил давомида аниқланган асосий муаммоларни ҳамда ишнинг кейинги босқичи учун зарур чора-тадбирларни кўриб чиқди.
Учрашувда халқаро ва хорижий экспертларнинг хулоса ҳамда тавсияларини ушбу соҳадаги норматив-ҳуқуқий ҳужжатларни ишлаб чиқиш ва такомиллаштиришда қўллаш масаласига алоҳида эътибор қаратилди.
Учрашув якунлари бўйича томонлар ОТБ билан ҳамкорликнинг устувор йўналишлари, аниқ чора-тадбирлар ва уларни амалга ошириш муддатларини белгилайдиган қўшма чора-тадбирлар режасини тайёрлашга келишиб олди.
Ушбу режа халқаро стандартлар ва экспертлар тавсияларини ҳисобга олган ҳолда Ўзбекистонда тўловга қобилиятсизлик тизимини ривожлантириш бўйича кейинги ишларни тизимлаштиришга хизмат қилиши кутилмоқда.
Учрашув Ўзбекистон ва ОТБ ўртасида тегишли норматив-ҳуқуқий базани такомиллаштириш ҳамда тўловга қобилиятсизликни тартибга солиш механизмларини ривожлантириш бўйича ҳамкорликнинг навбатдаги босқичи бўлди.
