Тошкент, Ўзбекистон (UzDaily.uz) — Қашқадарё вилоятида яқинда очилган FM World қишлоқ хўжалиги техникаси заводида замонавий тракторлар ва қишлоқ хўжалиги техникаси ишлаб чиқариш маҳаллийлаштирилади. Шунингдек, қишлоқ хўжалиги соҳаси учун дронлар ишлаб чиқариш ҳам йўлга қўйилади.
Бу топшириқни Президент Шавкат Мирзиёев ҳудуднинг ижтимоий-иқтисодий ривожланишига бағишланган йиғилишда берди. Бу ҳақда Ўзбекистон Республикаси Президенти матбуот котиби хабар берди.
Давлат раҳбари вилоятдаги йирик саноат корхоналари атрофида кооперация занжирларини шакллантиришга алоҳида эътибор қаратди. Йил охирига қадар Ғузор, Шўртан, Муборак, Деҳқонобод ва Нишон ҳудудларида олтита саноат кластерини ташкил этиш белгиланган.
Шўртан, Муборак, Яккабоғ ва Косон туманларида «Қашқадарё» эркин иқтисодий зонасининг филиаллари очилади. Уларнинг инфратузилмасини ривожлантириш учун биринчи босқичда 250 миллиард сўм ажратилади.
Президент ўтган ҳафта Ёқилғи-энергетика соҳасида инвесторлар кенгашининг биринчи йиғилишида муҳокама қилинган лойиҳаларга ҳам тўхталди. Masdar компанияси 2027 йилда Қашқадарё вилоятида қуввати 300 МВт бўлган қуёш электр станцияси ва 75 МВт қувватли энергия сақлаш тизимини ишга туширишни режалаштирмоқда. Лойиҳанинг умумий қиймати 250 миллион долларни ташкил этади.
Қарши туманида хитойлик инвесторлар иштирокида чиқиндилардан электр энергияси ишлаб чиқарадиган, қуввати 45 МВт бўлган станция қурилиши якунланмоқда.
Электр тармоқларини мустаҳкамлаш мақсадида Нишон ва Кўкдала туманларида йирик подстанциялар қурилиши учун 70 миллион доллар ажратилмоқда.
Яна 150 миллион доллар 245 километр узунликдаги Толимаржон — Сўғдиёна электр узатиш тармоғи қурилишига йўналтирилади. Ушбу объектларнинг барчасини келаси йили фойдаланишга топшириш топширилди.
