Тошкент, Ўзбекистон (UzDaily.uz) — Қашқадарё вилояти ҳудудидан ўтувчи А-380 автомобиль йўлининг 100 километрлик қисмини Осиё тараққиёт банки билан ҳамкорликда реконструкция қилиш бошланади. Лойиҳанинг қиймати 350 миллион долларни ташкил этади.
Бу ҳақда Президент Шавкат Мирзиёев вилоятнинг ижтимоий-иқтисодий ривожланишига бағишланган йиғилишда маълум қилди. Бу ҳақда Ўзбекистон Республикаси Президенти матбуот котиби хабар берди.
Қарши шаҳри атрофидаги айланма йўл яна 5,5 километрга узайтирилиб, А-380 магистралига уланади. Масъулларга йил охирига қадар лойиҳанинг техник-иқтисодий асосини тайёрлашни якунлаш ва 2027 йил январь ойида қурилишни бошлаш топширилди.
Бундан ташқари, темир йўл кесишмаларида юзага келаётган тирбандликлар муаммоси ҳам ҳал этилади.
Қарши — Помук ва Ғузор — Бейнеу автомобиль йўлларида поездлар ҳаракатланиши вақтида катта тирбандликлар юзага келмоқда. Ушбу участкаларда умумий қиймати 250 миллиард сўм бўлган иккита замонавий йўл ўтказгич қурилади.
