YIDXPda davlat xizmatlari uchun virtual to‘lov kartasi joriy etiladi

Toshkent, O’zbekiston (UzDaily.uz) — O‘zbekistonda Yagona interaktiv davlat xizmatlari portalida (YIDXP) davlat xizmatlari uchun to‘lov qilish maqsadida virtual bank kartasini bepul ochish imkoniyati yaratiladi. Yangi funksiya Prezidentning «Aholiga ko‘rsatilayotgan davlat xizmatlarini takomillashtirish va fuqarolar uchun qo‘shimcha qulayliklar yaratish chora-tadbirlari to‘g‘risida»gi qarorida nazarda tutilgan.

Raqamli texnologiyalar vazirligiga Adliya vazirligi va tijorat banklari bilan hamkorlikda ushbu xizmatni 1 sentyabrga qadar joriy etish topshirildi.

Hujjatga muvofiq, foydalanuvchilar YIDXP orqali tanlangan tijorat bankining virtual to‘lov kartasini ochishi yoki mavjud bank kartasini portalga bog‘lashi mumkin bo‘ladi. Ushbu kartadan davlat xizmatlari uchun to‘lovlarni amalga oshirishda foydalanish mumkin bo‘ladi.

Qarorda, shuningdek, davlat xizmati asossiz ravishda rad etilganida, uni ko‘rsatishning belgilangan muddatlari buzilganida, shuningdek, ortiqcha yoki xatolik bilan amalga oshirilgan to‘lovlar holatida mablag‘larni ariza beruvchining bank kartasiga avtomatik tarzda qaytarish tartibi ham nazarda tutilgan.

Bunda banklar virtual kartani ochish, uni to‘ldirish yoki undan mablag‘larni boshqa bank kartasiga o‘tkazish uchun komissiya undirmaydi.

Bundan tashqari, hujjatda voyaga yetmagan fuqarolarni o‘z huquqlarini mustaqil amalga oshirish (emansipatsiya) masalalari bo‘yicha sudga murojaat qilganda davlat bojini to‘lashdan ozod etish ham nazarda tutilgan. Adliya vazirligiga Milliy ijtimoiy himoya agentligi va Bolalar ombudsmani bilan birgalikda ikki oy muddatda tegishli qonun loyihasini Hukumatga kiritish topshirildi.