Yangi Toshkent va TTZga metro fast-track usulida quriladi

Toshkent, O’zbekiston (UzDaily.uz) — Toshkent shahrida metro tarmog‘ini kengaytirish ishlarini jadallashtirish rejalashtirilmoqda. O‘zbekiston Respublikasi Vazirlar Mahkamasining qaror loyihasiga ko‘ra, «Texnopark – Yangi Toshkent» va «Pushkin – TTZ» yangi metro yo‘nalishlari fast-track usuli asosida quriladi.

Mazkur yondashuv loyihalash va qurilish-montaj ishlarini bir vaqtning o‘zida amalga oshirishni nazarda tutadi. Bu esa maʼmuriy jarayonlarni qisqartirish va yirik infratuzilma obyektlarini barpo etish muddatlarini sezilarli darajada tezlashtirish imkonini beradi.

Loyihalar poytaxt transport tizimi uchun strategik ahamiyatga ega hisoblanadi. «Pushkin – TTZ» yo‘nalishining uzunligi 11 kilometrni tashkil etib, unda 10 ta stansiya va alohida depo qurilishi ko‘zda tutilgan. «Texnopark – Yangi Toshkent» tarmog‘i esa 21 kilometrga cho‘zilib, 9 ta stansiya hamda xizmat ko‘rsatuvchi depoga ega bo‘ladi.

Har ikki loyihaning yagona buyurtmachisi etib Yangi Toshkent shahrini qurish direksiyasi belgilangan. Qurilish ishlari Yevropa shaharsozlik standartlari va talablariga qatʼiy muvofiq ravishda amalga oshirilishi belgilanmoqda.

Yangi Toshkentgacha bo‘lgan metro yo‘nalishining birinchi bosqichini 2026 yilning o‘zida ishga tushirish rejalashtirilgan. Loyihani to‘liq foydalanishga topshirish muddati esa 2028 yil 1 sentyabr etib belgilangan.

Yirik qurilish ishlari boshlanishi munosabati bilan Kadastr agentligi, Toshkent shahri va Toshkent viloyati hokimliklari hamda boshqa mutasaddi idoralarga bir oy muddat ichida metro trassasi o‘tadigan hududlardagi yer uchastkalari, binolar, inshootlar va yashil hududlarni to‘liq xatlovdan o‘tkazish topshirilgan.

Hukumat mulkdorlar huquqlari himoya qilinishi taʼminlanishini taʼkidlamoqda. Jismoniy va yuridik shaxslarga yetkazilishi mumkin bo‘lgan zararni qoplash bo‘yicha manzilli kompensatsiya rejasi uch oy ichida ishlab chiqilib, hukumatga taqdim etiladi. Shuningdek, qurilish uchun zarur bo‘lgan ayrim qishloq xo‘jaligi yerlarining toifasini o‘zgartirish masalasi ham hal etiladi.

Qurilish ishlari davrida yer usti transporti harakati va logistika sxemalariga vaqtinchalik o‘zgartishlar kiritiladi. Transport vazirligi uzluksiz harakatni taʼminlash maqsadida aylanma yo‘nalishlarni ishlab chiqmoqda. Xususan, TTZ yo‘nalishi qurilishi doirasida mahalliy avtostansiyaning maʼmuriy binosi qurilish direksiyasi ixtiyoriga beriladi, avtobus yo‘nalishlari esa vaqtincha boshqa yo‘nalishlarga ko‘chiriladi.

Muqobil transport tugunlari sifatida Qibray avtostansiyasi hamda Qadrdon va Gulsanam ko‘chalari kesishmasida barpo etiladigan yangi transport markazidan foydalaniladi. Shu bilan birga, yo‘lovchilar uchun yangi metro stansiyalariga brutto-kontrakt tizimi asosida ishlovchi avtobus yo‘nalishlari yo‘lga qo‘yiladi.

Loyihalarni amalga oshirish jarayonida gaz, suv taʼminoti, elektr energiyasi va telekommunikatsiya tarmoqlarini ko‘chirish bo‘yicha keng ko‘lamli ishlar ham boshlanadi. Bu xarajatlar kommunikatsiya egalari mablag‘lari hamda 2027 yil uchun respublika byudjeti hisobidan ajratiladigan maqsadli mablag‘lar orqali qoplanadi.