Toshkentning ikki tumanida elektr taʼminoti tiklanmoqda

Toshkent, O‘zbekiston (UzDaily.uz) — Toshkent shahrida 110/10/6 kV kuchlanishli “Ko‘rgazmali” podstansiyasida yuzaga kelgan nosozlik oqibatida jabr ko‘rgan isteʼmolchilarning elektr taʼminotini bosqichma-bosqich tiklash ishlari boshlandi. Bu haqda O‘zbekiston Energetika vazirligi xabar qildi.

Vazirlik maʼlumotlariga ko‘ra, podstansiyaning T-2 transformatoriga kuchlanish berilgan. Hozirda mutaxassislar 6 va 10 kV taqsimlash qurilmalariga bosqichma-bosqich kuchlanish bermoqda. Shundan so‘ng isteʼmolchilarning elektr taʼminoti to‘liq tiklanadi.

Avvalroq Energetika vazirligi 1 iyun kuni soat 18:58 da 110 kV kuchlanishli podstansiyada 6 kV liniyalarini elektr energiyasi bilan taʼminlovchi uskunalarda nosozlik yuz berganini maʼlum qilgan edi. Hodisa oqibatida poytaxtning Shayxontohur va Olmazor tumanlaridagi ayrim isteʼmolchilar elektr taʼminotida vaqtinchalik uzilishlarga duch kelgan.

Vazirlik mutaxassislar avariya oqibatlarini bartaraf etish ishlariga tezkorlik bilan kirishganini qayd etdi. Shuningdek, isteʼmolchilardan yetkazilgan noqulayliklar uchun uzr so‘raldi.