Toshkentdagi yong‘in tufayli ayrim hududlarda elektr o‘chdi

Toshkent, O‘zbekiston (UzDaily.uz) —Toshkent shahrida 1 iyun kuni 110 kV kuchlanishli “Ko‘rgazma” podstansiyasida transformator yong‘in chiqishi oqibatida Olmazor va Shayxontohur tumanlaridagi ayrim isteʼmolchilar vaqtincha elektr taʼminotisiz qoldi.

Favqulodda vaziyatlar vazirligi matbuot xizmati maʼlumotiga ko‘ra, Olmazor tumanidagi Kichik halqa avtomobil yo‘lida joylashgan podstansiya hududidagi yong‘in haqidagi xabar soat 18:57 da kelib tushgan. Yong‘in-qutqaruv ekipajlari voqea joyiga soat 19:01 da yetib kelgan.

Yong‘in soat 19:12 da qurshab olingan va soat 19:17 da to‘liq bartaraf etilgan. Hodisa oqibatida jabrlanganlar yo‘q.

«O‘zbekistan milliy elektr tarmoqlari» aksiyadorlik jamiyati maʼlum qilishicha, elektr taʼminotidagi uzilishga “Ko‘rgazma” podstansiyasida yuzaga kelgan nosozlik sabab bo‘lgan. Hodisa tufayli mazkur energetika obyektining 6 kV chiqish qurilmalariga ulangan tarmoqlarda kuchlanish uzilgan.

Baxtsiz hodisa natijasida poytaxtning ikkita tumanida ayrim isteʼmolchilar elektr energiyasi bilan uzilishlarga duch kelishdi.

Ayni paytda mutaxassislar nosozlik sabablarini aniqlash va elektr taʼminotini to‘liq tiklash ishlarini olib bormoqda.