Toshkentda ko‘p qavatli uydagi yong‘in to‘liq o‘chirildi

Toshkent, O’zbekiston (UzDaily.uz) — Toshkent shahrining Yakkasaroy tumanida ko‘p qavatli turar joyning tashqi qismida yuzaga kelgan yong‘in bartaraf etildi.

Dastlabki maʼlumotlarga ko‘ra, hodisa oqibatida hech kim jabrlanmagan.

Favqulodda vaziyatlar vazirligi maʼlum qilishicha, Nukus ko‘chasida joylashgan turar joy fasadida yong‘in chiqqanligi haqidagi xabar Toshkent shahar favqulodda vaziyatlar boshqarmasiga 13 iyun kuni soat 10:21 da kelib tushgan.

Qutqaruv bo‘linmalari voqea joyiga ikki daqiqa ichida — soat 10:23 da yetib kelib, yong‘inni o‘chirish ishlarini boshlagan. Yong‘in yuzaga kelgan zahoti Favqulodda vaziyatlar vazirligi xodimlari uyning barcha aholisini xavfsiz hududga evakuatsiya qilgan.

Yong‘in soat 11:00 da lokallashtirilgan va ortidan o‘n daqiqa o‘tib to‘liq bartaraf etilgan.

Idorada taʼkidlanishicha, vaziyat favqulodda xizmatlar tomonidan to‘liq nazorat ostida bo‘lgan. Hozirgi vaqtda yong‘in kelib chiqish sabablari aniqlanmoqda.