Davlat aktivlari agentligi sobiq rahbari ishi sudga oshirildi

Toshkent, O’zbekiston (UzDaily.uz) — O‘zbekiston Davlat aktivlarini boshqarish agentligining sobiq direktori Akmalxon Ortiqovga nisbatan qo‘zg‘atilgan jinoyat ishi Mirobod tumani jinoyat ishlari bo‘yicha sudiga ko‘rib chiqish uchun yuborildi.

Ko‘rib chiqilishi belgilangan ishlar ro‘yxatiga ko‘ra, sud majlisi 20 iyul kuniga tayinlangan.

Ortiqovga Jinoyat kodeksining bir nechta moddalari bo‘yicha ayblov qo‘yilgan. Ular orasida kompyuter texnikasi vositalaridan foydalangan holda, uyushgan guruh tomonidan yoki uning manfaatlarini ko‘zlab, ayniqsa ko‘p miqdorda o‘zlashtirish yoki rastrata yo‘li bilan talon-toroj qilish, juda ko‘p miqdorda zarar yetkazilishiga sabab bo‘lgan mansab vakolatini suiisteʼmol qilish, shuningdek mansab soxtakorligi ham bor.

Qo‘yilgan ayblovlar bo‘yicha eng ko‘p jazo o‘n yilgacha ozodlikdan mahrum qilishni nazarda tutadi.

Sobiq agentlik rahbari bilan birga Smart Expert Group rahbari Ziyoviddin Jabborov, Veritas baholash kompaniyasi asoschisi va rahbari Zuhriddin Nig‘manxanov, Master Expert baholash kompaniyasi muassisi Ravshan Xalitkariyev, Saidjon Saidov hamda Kontinent Imkon Baho baholash kompaniyasi rahbari Shermatjon Jo‘rayev ham sud oldida javob beradi.

Sud maʼlumotlariga ko‘ra, mazkur besh nafar shaxsga ham o‘zlashtirish yoki rastrata yo‘li bilan talon-toroj qilish hamda mansab soxtakorligi bo‘yicha ayblov qo‘yilgan. Bundan tashqari, Jabborov, Xalitkariyev va Jo‘rayev nodavlat tijorat yoki boshqa nodavlat tashkiloti mansabdor shaxslari tomonidan vakolatlarni suiisteʼmol qilishda ham ayblanmoqda.

Mazkur ish bo‘yicha daʼvogar sifatida Davlat aktivlarini boshqarish agentligi ichki audit xizmati bo‘limi boshlig‘i Timur Alibekov qatnashmoqda. Ishni sudya Hasan Ochilov ko‘rib chiqadi.

Akmalxon Ortiqov 2026 yil yanvar oyida Davlat aktivlarini boshqarish agentligi direktori lavozimidan ozod etilgan edi.

O‘shanda Prezident Shavkat Mirziyoyev milliardlab so‘mlik talon-torojlik holatlari aniqlanganini maʼlum qilgan. Davlat rahbari so‘zlariga ko‘ra, agentlik mansabdorlari bozor qiymati kamida 250 milliard so‘m bo‘lgan yer uchastkasini yopiq auksionga chiqarib, uni 120 milliard so‘mga sotgan.

Shundan so‘ng idorang sobiq rahbari qamoqqa olingan. Prezident, shuningdek, Davlat xavfsizlik xizmati raisi Baxodir Qurbonovga Davlat aktivlarini boshqarish agentligi va “O‘zbekneftgaz” faoliyatini nazorat qilgan xodimlarning masʼuliyati masalasini ko‘rib chiqishni topshirgan.