Toshkent viloyatida Bozsu kanalida ikki bola halok bo‘ldi

Toshkent, O’zbekiston (UzDaily.uz) — Toshkent viloyati Bo‘stonliq tumanida 17 iyun kuni Bozsu kanaliga tushib ketgan 8 va 10 yoshli ikki bolani qidirish ishlari yakunlandi. Toshkent viloyati Favqulodda vaziyatlar boshqarmasi maʼlumotiga ko‘ra, har ikki bolaning jasadi ko‘p kunlik qidiruv-qutqaruv operatsiyasi davomida qutqaruvchilar tomonidan topilgan.

Fojia “Obod” mahallasi hududida sodir bo‘lgan bo‘lib, kanal turar joylarga yaqin joydan oqib o‘tadi. Dastlabki maʼlumotlarga ko‘ra, bolalar ehtiyotsizlik oqibatida suvga tushib ketgan.

Qidiruv-qutqaruv ishlari bir necha kun davomida uzluksiz olib borilgan bo‘lib, unda g‘avvoslar va tezkor xizmat xodimlari ishtirok etgan. Birinchi bolaning jasadi 21 iyun kuni topilgan.

Toshkent viloyati Favqulodda vaziyatlar boshqarmasi maʼlum qilishicha, ikkinchi bolaning jasadi 22 iyun kuni soat 16:50 da g‘avvos-qutqaruvchilar tomonidan aniqlangan, shundan so‘ng qidiruv operatsiyasi tugatilgan.

Hozirda vakolatli organlar voqeaning barcha holatlarini o‘rganmoqda.