Sirdaryo viloyati Xitoy bilan hamkorlikni kengaytirmoqda

Toshkent, O’zbekiston (UzDaily.uz) — O‘zbekistonning Sirdaryo viloyatida Xitoy kompaniyalari bilan investitsiya loyihalarini amalga oshirish istiqbollari muhokama qilindi. Viloyat hokimi Erkinjon Turdimov muzokaralarni «Sirdaryoda biznes yuriting» xalqaro investitsiya forumi doirasida o‘tkazdi. Bu haqda Sirdaryo viloyati hokimligi matbuot xizmati xabar berdi.

Uchrashuvlar Xitoyning «Xinjiang Hefu», “Baolun”, “Xigua” va «AI Car» kompaniyalari, shuningdek, Chjeszyan provinsiyasi Arxitektura-qurilish tadqiqotlari instituti vakillari bilan bo‘lib o‘tdi.

Tomonlar bir qator yo‘nalishlarda loyihalarni amalga oshirish imkoniyatlarini ko‘rib chiqdi. Ular orasida pitaxayya va mango yetishtirish, baliqchilikni rivojlantirish, qurilish materiallari ishlab chiqarish hamda zamonaviy onlayn taksi xizmatini ishga tushirish bor.

Muzokaralarda shaharsozlik sohasidagi hamkorlik istiqbollariga alohida eʼtibor qaratildi. Xususan, Sirdaryo daryosi sohilida «Yangi shahar» konsepsiyasini ishlab chiqish masalasi muhokama qilindi.

Bundan tashqari, tomonlar «Ikki mamlakat — ikki bog‘» loyihasi doirasida sanoat parki tashkil etish masalasini ko‘rib chiqdi.

Uchrashuvlar yakunida ishtirokchilar taklif etilgan loyihalarni batafsil ishlab chiqishni davom ettirish va erishilgan kelishuvlarni amaliy bosqichga o‘tkazishga kelishib oldi.