O‘zbekiston va Gruziya yuk ruxsatnomalarini E-permitga o‘tkazdi

Toshkent, O’zbekiston (UzDaily.uz) — O‘zbekiston va Gruziya xalqaro avtomobil yuk tashuvlari uchun E-permit elektron ruxsatnomalar tizimini joriy qildi. Endi milliy tashuvchilar ikki tomonlama, tranzit tashuvlar, shuningdek, uchinchi davlatlarga va ulardan amalga oshiriladigan tashuvlar uchun ruxsatnomalarni elektron shaklda oladi. Bu haqda O‘zbekiston Respublikasi Transport vazirligi xabar berdi.

Elektron formatga o‘tish milliy tashuvchilar uchun ruxsatnomalarni rasmiylashtirish jarayonini soddalashtirish va maʼmuriy kechikishlarni qisqartirishga qaratilgan. Gruziya bilan tashuvlar bo‘yicha tegishli qog‘oz ruxsatnoma blankalari taqsimlanadigan ruxsatnomalar toifasidan chiqarildi.

Yangi turdagi ruxsatnomani tashuvchilar taqdim etilgan arizalar asosida olishlari mumkin. Hujjatlar qog‘oz blanklardan foydalanilmagan holda faqat E-permit tizimi orqali rasmiylashtiriladi.

Transport vazirligi taʼkidlashicha, elektron tizimning joriy etilishi xalqaro avtomobil tashuvlari uchun ruxsatnomalar olish jarayonini tezlashtirishi kerak. Bundan tashqari, raqamli formatga o‘tish qog‘oz hujjatlardan foydalanishni qisqartirish va inson omili taʼsirini minimallashtirish imkonini beradi.

Yangi tizim O‘zbekiston va Gruziya o‘rtasida xalqaro yuk tashuvlarini amalga oshirayotgan milliy tashuvchilar uchun ruxsatnomalarni rasmiylashtirish mexanizmini yana-da qulay va shaffof qilishga ham xizmat qilishi kutilmoqda.