Oʻzbekiston va Latviya iqtisodiy hamkorlikni kengaytirish masalalarini muhokama qilishdi

Toshkent, O’zbekiston (UzDaily.uz) — 16-iyul kuni Investitsiyalar, sanoat va savdo vaziri Laziz Kudratov Latviyaning O‘zbekistondagi Favqulodda va Muxtor Elchisi Girts Yaunzems bilan uchrashuv o‘tkazdi.

Tomonlar Hukumatlararo komissiyaning 9-yig‘ilishi qarorlarining ijrosi hamda savdo va investitsiyaviy aloqalarni yanada rivojlantirish masalalarini ko‘rib chiqdilar. O‘zbekiston–Latviya Qo‘shma ishbilarmonlar kengashini tashkil etish, Toshkent shahrida savdo uyini ochish, shuningdek, Riga shahrida 70 ga yaqin o‘zbekistonlik kompaniyalar ishtirokida o‘tkazilgan “Made in Uzbekistan” ko‘rgazmasi yakunlariga alohida e’tibor qaratildi.

Hamkorlikni kengaytirishning istiqbolli yo‘nalishlari muhokama qilindi. Xususan, farmatsevtika, agrosanoat majmuasi, o‘g‘itlar, qadoqlash mahsulotlari va baliq mahsulotlari ishlab chiqarish sohalaridagi tashabbuslar ko‘rib chiqildi. Shuningdek, Riga va Ventspils portlari orqali logistika yo‘nalishlarini kengaytirish, aviaqatnovlarni ko‘paytirish hamda Latviya kompaniyalarini O‘zbekistondagi yangi loyihalarga jalb etish masalalari muhokama markazida bo‘ldi.

Uchrashuv yakunida tomonlar belgilangan tashabbuslarni izchil amalga oshirish va iqtisodiy hamkorlikni yanada mustahkamlashga tayyor ekanliklarini tasdiqladilar.