O‘zbekistonda elektromobillar soni 109 mingdan oshdi

Toshkent, O’zbekiston (UzDaily.uz) — 2026 yil 1 aprel holatiga ko‘ra, O‘zbekiston Respublikasida ro‘yxatdan o‘tgan elektromobillar soni 109,2 mingtani tashkil qildi. Bu haqda Milliy statistika qo‘mitasi maʼlum qildi.

Taqdim etilgan maʼlumotlar aholi orasida elektromobillarga qiziqish yuqori ekanini ko‘rsatmoqda. Shu bilan birga, hududlar kesimidagi ko‘rsatkichlar sezilarli darajada farq qiladi.

Yengil elektr transportini joriy etish va undan foydalanish bo‘yicha mutlaq yetakchi Toshkent shahri bo‘lib qolmoqda. Poytaxtda respublikadagi barcha elektromobillarning asosiy qismi — 79 ming 851 ta elektromobil ro‘yxatdan o‘tgan.

Reytingda ikkinchi o‘rinni Toshkent viloyati egallab turibdi. Hisobot sanasi holatiga ko‘ra, hududda 8 ming 194 ta ekologik toza avtomobil qayd etilgan. Uchinchi o‘rindan esa Samarqand viloyati joy olgan bo‘lib, bu yerda 4 ming 525 ta elektromobil ro‘yxatdan o‘tgan.

O‘zbekistonning boshqa hududlaridagi ko‘rsatkichlar quyidagicha taqsimlangan: Xorazm viloyatida 3 ming 42 ta, Qashqadaryo viloyatida 2 ming 611 ta, Farg‘ona viloyatida 2 ming 231 ta, Navoiy viloyatida 1 ming 756 ta, Buxoro viloyatida 1 ming 685 ta va Andijon viloyatida 1 ming 477 ta elektromobil ro‘yxatga olingan.

Shuningdek, Namangan viloyatida 1 ming 156 ta, Qoraqalpog‘iston Respublikasida esa 1 ming 10 ta elektromobil mavjud bo‘lib, ushbu hududlar ham mingtalik marrani ortda qoldirgan.

Elektromobillar tarqalishi bo‘yicha eng past ko‘rsatkichlar Sirdaryo viloyatida 799 ta, Jizzax viloyatida 517 ta va Surxondaryo viloyatida 315 ta avtomobil bilan qayd etilgan.