O‘zbekistonda elektr energiyasi isteʼmoli bo‘yicha yangi rekord o‘rnatildi

Toshkent, O’zbekiston (UzDaily.uz) — O‘zbekiston Yagona energetika tizimida 15 iyul kuni elektr energiyasini sutkalik isteʼmol qilish va ishlab chiqarish bo‘yicha yangi rekord ko‘rsatkichlar qayd etildi. Bu haqda Energetika vazirligi xabar qildi.

Sutkalik elektr energiyasi isteʼmoli 288,1 million kVt·soatga yetdi va bu yozgi mavsum uchun yangi maksimum bo‘ldi. 14 iyul kuni qayd etilgan avvalgi rekord — 284 million kVt·soat 4,1 million kVt·soatga, yoki 1,44 foizga yangilandi.

Shu bilan birga, elektr energiyasi ishlab chiqarish bo‘yicha ham rekord yangilandi. Mamlakat elektr stansiyalari bir sutkada 291,4 million kVt·soat elektr energiyasi ishlab chiqardi. Bu 14 iyul kuni qayd etilgan avvalgi 287,3 million kVt·soatlik maksimumdan 4,1 million kVt·soatga, yoki 1,43 foizga yuqori.

Vazirlikning maʼlum qilishicha, yuqori yuklama sharoitida energetika korxonalarining avariya-taʼmirlash brigadalari barqaror elektr taʼminotini taʼminlash va yuzaga kelayotgan nosozliklarni tezkor bartaraf etish maqsadida kuchaytirilgan tartibda ishlamoqda.

Xususan, 15 iyul kuni mutaxassislar Toshkent shahrining Uchtepa, Chilonzor, Shayxontohur, Mirzo Ulug‘bek, Yashnobod va Sergeli tumanlaridagi elektr tarmoqlarining ayrim uchastkalarida yuzaga kelgan shikastlanishlarni bartaraf etdi.

Bundan tashqari, soat 10:56 da Farg‘ona viloyatidagi “L-Arsif-1” elektr uzatish liniyasida nosozlik qayd etildi. Buning oqibatida Quva tumanining isteʼmolchilarining bir qismi vaqtincha elektr taʼminotisiz qoldi. Soat 11:35 ga kelib mutaxassislar nosozlikni bartaraf etib, elektr energiyasi taʼminotini to‘liq tikladi.

16 iyul kuni tungi soat 00:12 da Toshkent shahridagi podstansiyalardan birida ham nosozlik qayd etildi. Buning natijasida Chilonzor va Yakkasaroy tumanlarining ayrim hududlarida vaqtincha elektr taʼminoti uzildi. Vazirlik maʼlumotiga ko‘ra, tiklash ishlari davom etmoqda.

Idorada taʼkidlanishicha, elektr stansiyalari, podstansiyalar, transformator punktlari, elektr uzatish liniyalari va boshqa uskunalarni modernizatsiya qilish ishlari davom etmoqda. Shuningdek, mavsumiy yuqori yuklama davrlarida energiya taʼminoti ishonchliligini oshirish maqsadida ularning quvvatini kengaytirishga qaratilgan loyihalar amalga oshirilmoqda.

Energetika vazirligi maksimal isteʼmol soatlarida elektr tarmoqlaridagi texnik nosozliklar sababli ayrim hududlarda qisqa muddatli elektr taʼminotida uzilishlar kuzatilishi mumkinligidan ogohlantirdi. Shuningdek, mamlakat aholisi havoning g‘ayrioddiy yuqori harorati davrida elektr energiyasidan oqilona foydalanishga chaqirildi.