O‘zbekistonda elektr energiyasi ishlab chiqarish 7,1%ga oshdi

Toshkent, O’zbekiston (UzDaily.uz) — O‘zbekistonda 2026 yilning yanvar–iyun oylarida 45,45 mlrd kVt·soat elektr energiyasi ishlab chiqarildi. Bu o‘tgan yilning shu davriga nisbatan 7,1 foizga ko‘p. Bu haqda Energetika vazirligi maʼlum qildi.

Vazirlik maʼlumotlariga ko‘ra, olti oy davomida elektr energiyasi ishlab chiqarish hajmi 45 mlrd 451,8 mln kVt·soatni tashkil etgan. Bu 2025 yilning birinchi yarim yilligiga nisbatan 2 mlrd 995,3 mln kVt·soatga ko‘pdir.

Shu davrda elektr energiyasi isteʼmoli 44 mlrd 42,9 mln kVt·soatni tashkil qildi. O‘tgan yilning mos davriga nisbatan ushbu ko‘rsatkich 2 mlrd kVt·soatga yoki 4,7 foizga oshgan.

Iyun oyida ham elektr energiyasi ishlab chiqarish o‘sish surʼati jadallashdi. Bir oy davomida mamlakatda 7 mlrd 751,1 mln kVt·soat elektr energiyasi ishlab chiqarildi. Bu o‘tgan yilning iyun oyiga nisbatan 921,1 mln kVt·soatga yoki 13,5 foizga ko‘pdir.

Iyun oyida elektr energiyasi isteʼmoli 7 mlrd 707,9 mln kVt·soatga yetdi. Bu 2025 yilning shu oyiga nisbatan 609,6 mln kVt·soatga yoki 8,6 foizga ko‘proqdir.