Toshkent, O’zbekiston (UzDaily.uz) — O‘zbekistonda Guliston shahridagi “Bek” choyxonasida 2025 yil 2 dekabr kuni gaz balloni portlashi bilan bog‘liq ish bo‘yicha olti nafar sudlanuvchiga hukm chiqarildi.
Fojia oqibatida olti nafar oshpaz halok bo‘lgan, yana o‘nlab kishi tan jarohatlari olgan. Jinoyat ishlari bo‘yicha Oqoltin tuman sudi 2026 yil 21 sentyabr kuni hukm chiqardi.
Ish materiallariga ko‘ra, portlashga 2010 yilda ishlab chiqarilgan ballondan gaz sizib chiqishi sabab bo‘lgan. Ballon oshxona qozoni gorelkasidan tarqalgan yuqori harorat taʼsirida yorilgan. Uning oxirgi texnik ko‘rigi 2015 yilda o‘tkazilgan.
Oshxonada, shuningdek, 2000, 2013 va 2018 yillarda ishlab chiqarilgan gaz ballonlaridan ham foydalanilgan. Ular belgilangan muddatlarda texnik tekshiruvdan o‘tkazilmagan.
Hodisadan bir kun oldin choyxona xodimlari to‘rtta ballonni Mirzaobod tumanidagi avtomobil gaz to‘ldirish shoxobchasiga olib borgan.
Shoxobchada maishiy gaz ballonlarini suyultirilgan gaz bilan to‘ldirish uchun tegishli litsenziya bo‘lmaganiga qaramay, ballonlar to‘ldirilgan. 2 dekabr kuni ertalab ular oshxona plitasi va qozonlariga ulangan. Soat 10:50 da ballonlardan biri portlagan.
Choyxona rahbari aybini qisman tan olgan. Uning tushuntirishicha, 2025 yil oktyabr oyidan boshlab muassasada gaz bosimi pastligi sababli propan ballonlaridan foydalanish boshlangan. Rahbar meʼyoriy hujjatlar talablarini to‘liq o‘rganmasdan, ulardan foydalanishga ruxsat berganini aytgan.
Shuningdek, rahbar muassasa jabrlanganlar va halok bo‘lganlarning oilalariga moddiy yordam ko‘rsatganini bildirgan. Sudda u halok bo‘lganlarning yaqinlaridan kechirim so‘ragan va qaramog‘ida to‘rt nafar farzandi borligini, ulardan biri nogironligi bo‘lgan shaxs ekanini inobatga olishni iltimos qilgan.
Sudlanuvchilardan uch nafari og‘ir oqibatlarga olib kelgan mehnatni muhofaza qilish va yong‘in xavfsizligi qoidalarini buzishda aybdor deb topildi. Yana uch nafari mehnatni muhofaza qilish qoidalarini buzganlik uchun sudlandi.
Choyxona rahbari 3,5 yil muddatga ozodlikdan mahrum etildi. Shuningdek, unga umumiy ovqatlanish korxonalarida moddiy javobgarlik bilan bog‘liq lavozimlarni egallash taqiqlandi. Taqiq muddati 2,5 yilni tashkil etadi.
Boshqa ikki sudlanuvchining har biri 3 yilu 1 oy muddatga ozodlikdan mahrum etildi. Ularga 1,5 yil davomida umumiy ovqatlanish sohasida ishlash ham taqiqlandi.
Qolgan uch nafar sudlanuvchiga ozodlikni cheklash jazosi tayinlandi. Ularning biri to‘rt yilga ozodligi cheklanishi bilan birga, ikki yil davomida yoqilg‘i quyish sohasida tadbirkorlik faoliyati bilan shug‘ullanish huquqidan mahrum qilindi.
Qolgan ikki sudlanuvchining har biriga 3,5 yil muddatga ozodlikni cheklash jazosi tayinlandi. Ularga ikki yil davomida avtomobil gaz to‘ldirish shoxobchalarida ishlash taqiqlandi.
Sud, shuningdek, umumiy qiymati 8,7 milliard so‘mlik ko‘chmas mulk va «Bek family cafe» hamda «Guliston GTSh» kompaniyalariga tegishli sakkizta avtomobilga qo‘yilgan xatlovni o‘z kuchida qoldirdi.
Mazkur mol-mulkka qo‘yilgan xatlov manfaatdor shaxslarning daʼvolari ko‘rib chiqilgunga qadar amal qiladi.
Portlashdan keyingi dastlabki kunlarda uch kishi halok bo‘lgani, turli darajadagi kuyish jarohatlari bilan 29 kishi shifoxonaga yotqizilgani haqida xabar berilgan edi.
Keyinchalik halok bo‘lganlar soni olti nafarga yetdi.
2025 yil 4 dekabr kuni Prezident Shavkat Mirziyoyev Respublika shoshilinch tibbiy yordam ilmiy markazining Sirdaryo viloyati filialida davolanayotgan jabrlanganlar holidan xabar oldi va halok bo‘lganlarning oilalariga hamdardlik bildirdi.
