O‘zbekiston va Ozarbayjon munosabatlarni rivojlantirishni muhokama qildi

Toshkent, O’zbekiston (UzDaily.uz) — O‘zbekiston tashqi ishlar vaziri Baxtiyor Saidov Ozarbayjon Respublikasi tashqi ishlar vaziri o‘rinbosari Samir Sharifovni qabul qildi.

Tomonlar ikki tomonlama munosabatlarning dolzarb kun tartibi hamda ikki mamlakat tashqi siyosat idoralari o‘rtasida o‘tkazilgan navbatdagi siyosiy maslahatlashuvlar yakunlarini muhokama qildi. Bu haqda Baxtiyor Saidov ijtimoiy tarmoqlarda maʼlum qildi.

Uchrashuv davomida tomonlar O‘zbekiston va Ozarbayjon tashqi ishlar vazirliklari o‘rtasidagi navbatdagi siyosiy maslahatlashuvlar natijalarini olqishladi.

Saidov ikki davlat rahbarlari o‘rtasidagi faol, do‘stona va ishonchli muloqot O‘zbekiston va Ozarbayjon o‘rtasidagi strategik sheriklik va ittifoqchilik munosabatlarini jadal rivojlantirishda muhim ahamiyatga ega ekanini taʼkidladi.

Tomonlar, shuningdek, ikki tomonlama munosabatlarning dolzarb masalalarini atroflicha muhokama qildi.