O‘zbekiston TIV rahbari Germaniya elchisi bilan uchrashdi

Toshkent, O’zbekiston (UzDaily.uz) — O‘zbekiston tashqi ishlar vaziri Baxtiyor Saidov mamlakatdagi diplomatik missiyasini yakunlayotgan Germaniyaning O‘zbekistondagi Favqulodda va Muxtor Elchisi Manfred Xuterer bilan xayrlashuv uchrashuvini o‘tkazdi. Uchrashuv yakunlari haqida tashqi ishlar vaziri o‘zining Telegram-kanalida maʼlum qildi.

Uning so‘zlariga ko‘ra, tomonlar Manfred Xutererning O‘zbekistondagi faoliyati davomida oliy darajadagi uchrashuvlar muvaffaqiyatli tashkil etilganini, ikki mamlakat tashqi siyosat idoralari o‘rtasidagi muloqot mustahkamlanganini, shuningdek, O‘zbekiston va Germaniya o‘rtasidagi ko‘p qirrali sheriklik sifat jihatidan yangi bosqichga ko‘tarilganini taʼkidladi.

Baxtiyor Saidov elchiga ikki tomonlama munosabatlarni rivojlantirishga qo‘shgan hissasi uchun minnatdorlik bildirib, unga kelgusi kasbiy faoliyatida muvaffaqiyat tiladi.

Manfred Xuterer 2024 yil 20 sentyabr kuni O‘zbekiston Prezidenti Shavkat Mirziyoyevga ishonch yorliqlarini topshirgan edi. Ushbu lavozimda u 2021–2024 yillarda Germaniyaning Toshkentdagi elchixonasiga rahbarlik qilgan Tilo Klinnerning o‘rnini egallagan.