O‘zbekiston hududlarida elektr taʼminoti tiklandi
Toshkent, O’zbekiston (UzDaily.uz) — O‘zbekistonning aksariyat hududlarida qo‘shni davlat energetika tizimida yuz bergan avariya sababli kelib chiqqan uzilishlardan so‘ng elektr taʼminoti to‘liq tiklandi. Surxondaryo viloyatida elektr energiyasi taʼminoti yaqin vaqt ichida tiklanadi. Bu haqda O‘zbekiston Energetika vazirligi xabar berdi.
Avariya 14 avgust kuni soat 14:38 da sodir bo‘lib, Markaziy Osiyoning yagona energetika tizimi ishiga taʼsir ko‘rsatgan. Natijada Surxondaryo viloyati va O‘zbekistonning boshqa hududlarida elektr taʼminotida uzilishlar yuzaga kelgan.
Energetika vazirligi maʼlumotlariga ko‘ra, avariya oqibatlarini bartaraf etish bo‘yicha ishlar yakunlangan. Ayni paytda mamlakatning qolgan barcha hududlarida elektr taʼminoti to‘liq tiklangan.
Avval xabar qilinganidek, Qozog‘iston energetika tizimidagi avariya L-5400, L-5300 va L-5320 elektr uzatish liniyalarining uzilishiga olib kelgan. Shundan so‘ng «Alatau Jariq Kompaniyasi» AJ tarmoqlarida avariyaga qarshi avtomatika ishga tushgan.
Natijada Olmaota shahri va Olmaota viloyatidagi isteʼmolchilarning bir qismi elektr energiyasiz qolgan. Mahalliy OAV maʼlumotlariga ko‘ra, uzilgan yuklama hajmi 300 MVtni tashkil etgan.
«O‘zbekiston milliy elektr tarmoqlari» mutaxassislari avariya oqibatlarini bartaraf etish va energetika tizimining normal ishlashini tiklash bo‘yicha ishlarni amalga oshirgan.
