O‘zbekiston banklarida chakana kreditlar ulushi 37 foizga yetdi

Toshkent, O’zbekiston (UzDaily.uz) — 2026 yil 1 iyun holatiga ko‘ra, O‘zbekiston bank tizimining jami kredit portfeli 636 trln so‘mga yetdi. Bu o‘tgan yilning mos davriga nisbatan 12 foizga ko‘pdir. Shu bilan birga, jismoniy shaxslarga ajratilgan kreditlar ulushi 34 foizdan 37 foizgacha oshdi, bu esa chakana kreditlashning ahamiyati ortib borayotganini ko‘rsatadi.

Aholiga berilgan kreditlar hajmi 232,9 trln so‘mni tashkil etdi. Ayni paytda eng yirik kreditlash yo‘nalishi hamon sanoat sohasi bo‘lib qolmoqda. Ushbu tarmoq hissasiga 139,5 trln so‘m to‘g‘ri keladi. Biroq uning umumiy kredit portfelidagi ulushi bir yil ichida 28 foizdan 22 foizgacha kamaydi.

Qishloq xo‘jaligidagi kredit portfeli 67,2 trln so‘mga yetdi, bu umumiy hajmning 11 foiziga teng. Savdo va xizmatlar sohasi hissasiga 53,2 trln so‘m yoki portfelning 8 foizi, transport va kommunikatsiyalar sohasiga esa 34,4 trln so‘m yoki 5 foiz to‘g‘ri keladi.

Tarmoqlar orasida eng yuqori o‘sish surʼati qurilish sohasida qayd etildi. Mazkur yo‘nalishda kreditlash hajmi o‘tgan yilning mos davriga nisbatan 48 foizga oshib, 21,6 trln so‘mga yetdi.