O‘zbekiston va Isroil bandlik sohasida hamkorlikni kengaytiradi

Toshkent, O’zbekiston (UzDaily.uz) — O‘zbekiston Migratsiya agentligi rahbari Bexzod Musayev Isroilning O‘zbekistondagi favqulodda va muxtor elchisi Gideon Lustig bilan uchrashdi. Bu haqda Agentlik matbuot xizmati xabar berdi.

Tomonlar O‘zbekiston fuqarolarini Isroilda tashkillashtirilgan holda ishga joylashtirishni kengaytirish va ularni ishga qabul qilish mexanizmlarini takomillashtirish masalalarini muhokama qildi.

Uchrashuvda nomzodlarni tanlash jarayonini yaxshilash hamda O‘zbekiston fuqarolarining Isroilda ishga joylashishi bilan bog‘liq xarajatlarni kamaytirishga alohida eʼtibor qaratildi.

Isroil tomoni O‘zbekiston fuqarolarining qurilish va parvarish sohalaridagi mehnatini ijobiy baholadi. Shu bilan birga, qishloq xo‘jaligi, tibbiy yordam va texnik mutaxassisliklar bo‘yicha hamkorlikni kengaytirish imkoniyatlari qayd etildi.

Muzokaralar yakunida Isroil Aholi va immigratsiya masalalari boshqarmasi (PIBA) rahbarining O‘zbekistonga tashrifini tashkil etish bo‘yicha kelishuvga erishildi. Kutilishicha, ushbu tashrif mehnat migratsiyasi sohasidagi hamkorlikni yanada rivojlantirish yo‘nalishlaridan biri bo‘ladi.