Toshkent, O’zbekiston (UzDaily.uz) — Soliq qo‘mitasi huzuridagi Oliy soliq maktabi va Rossiya Federal soliq xizmati (FSB)ning Liderlik va biznes-jarayonlarni boshqarish akademiyasi (FSB akademiyasi) ikki tomonlama hamkorlik to‘g‘risida kelishuv imzoladi.
Hujjat xalqaro hamkorlikni kengaytirish hamda zamonaviy bilim va kasbiy kompetensiyalarga ega bo‘lgan soliq sohasi mutaxassislarini tayyorlash tizimini rivojlantirishga qaratilgan.
Oliy soliq maktabi rektori Igitaliy Narziyev va FSB akademiyasi rektori Ivan Yefremov kelishuv soliq tizimi uchun kadrlarni tayyorlash va ularning kasbiy rivojlanishi sohasidagi hamkorlikni yangi bosqichga olib chiqishini taʼkidladi. Ustuvor yo‘nalishlar qatorida zamonaviy taʼlim texnologiyalarini joriy etish va ilg‘or tajriba almashish ham qayd etildi.
Tashrif doirasida tomonlar soliq maʼmuriyatchiligini takomillashtirish va kadrlar salohiyatini rivojlantirish masalalarini ko‘rib chiqdi. Zamonaviy taʼlim dasturlari, raqamli texnologiyalar hamda ilmiy-tadqiqot sohasidagi hamkorlikni rivojlantirishga alohida eʼtibor qaratildi.
Oliy soliq maktabi vakillari, shuningdek, FSB akademiyasining taʼlim va malaka oshirish sohasidagi faoliyati, shuningdek, amalga oshirilayotgan ilg‘or taʼlim dasturlari bilan tanishdi.
Uchrashuvlar yakunlari bo‘yicha tomonlar o‘zaro manfaatli hamkorlikni izchil kengaytirish, tajriba almashishning amaliy mexanizmlarini takomillashtirish hamda soliq sohasi uchun malakali mutaxassislar tayyorlash bo‘yicha qo‘shma loyihalarni amalga oshirishga tayyorligini tasdiqladi.
