O‘zbekistonda ipoteka subsidiyalari 1,14 trln so‘mdan oshdi

Toshkent, O’zbekiston (UzDaily.uz) — 2026 yilda O‘zbekistonning 12 355 nafar fuqarosiga ipoteka kreditlarini olish uchun jami 1 141,2 mlrd so‘m miqdorida subsidiya to‘lab berildi. Bu haqda O‘zbekiston Respublikasi Iqtisodiyot va moliya vazirligi xabar berdi.

Ajratilgan mablag‘larning 367 mlrd so‘mi dastlabki badalni yoki uning bir qismini qoplashga, 774,1 mlrd so‘mi esa avvalgi yillarda ajratilgan ipoteka kreditlari bo‘yicha foiz to‘lovlarini qoplashga yo‘naltirilgan.

Dastlabki badalni qoplash uchun eng ko‘p subsidiya Andijon viloyatiga to‘g‘ri kelgan — 1472 nafar fuqaroga 43,8 mlrd so‘m. Keyingi o‘rinlarda Farg‘ona viloyati — 1410 nafar fuqaro uchun 41,9 mlrd so‘m va Namangan viloyati — 1406 nafar fuqaro uchun 41,6 mlrd so‘m qayd etilgan.

Yuqori ko‘rsatkichga ega hududlar qatoriga Qashqadaryo viloyati ham kirgan bo‘lib, bu yerda 1260 nafar fuqaroga 37,5 mlrd so‘m subsidiya ajratilgan. Surxondaryo viloyatida 1184 nafar fuqaroga 35,4 mlrd so‘m, Samarqand viloyatida esa 1030 nafar fuqaroga 30,4 mlrd so‘m subsidiya berilgan.

Eng kam hajm Sirdaryo viloyatida qayd etilgan — 410 nafar fuqaroga 12,2 mlrd so‘m. Toshkent shahrida esa 389 nafar fuqaroga 11,6 mlrd so‘m subsidiya ajratilgan.

Tijorat banklari orasida subsidiyalangan ipoteka kreditlari soni va hajmi bo‘yicha Agrobank yetakchi bo‘ldi. Bank orqali 3779 nafar qarz oluvchiga 112,3 mlrd so‘m miqdorida kredit ajratilgan. Ularning 151 nafariga 6,12 mlrd so‘mlik maqsadli ipoteka kreditlari to‘g‘ri kelgan.

Keyingi o‘rinlarda Ipotekabank — 1538 nafar qarz oluvchiga 45,4 mlrd so‘m va Xalq banki — 1371 nafar qarz oluvchiga 40,8 mlrd so‘m ko‘rsatkich bilan qayd etilgan.

Shuningdek, faol banklar qatoriga Biznesni rivojlantirish banki ham kirgan — 1326 nafar qarz oluvchiga 39,2 mlrd so‘m. O‘zsanoatqurilishbank orqali esa 1164 nafar qarz oluvchiga 34,8 mlrd so‘m ajratilgan.

Eng kam hajm Asakabankda qayd etilgan — 107 nafar qarz oluvchiga 3,2 mlrd so‘m. Orient Finans Bank orqali 42 nafar qarz oluvchiga 1,2 mlrd so‘m, Infinbank orqali esa 2 nafar qarz oluvchiga 0,1 mlrd so‘mlik ipoteka krediti berilgan.

Vazirlik maʼlumotlariga ko‘ra, subsidiyalash dasturi dastlabki badalni qoplash bilan bir qatorda, avval ajratilgan ipoteka kreditlari bo‘yicha foiz to‘lovlarining bir qismini qoplashni ham qamrab oladi.