Oʻzbekistonlik TheCarGo startapi 110 ming dollar mablagʻ jalb qildi

Toshkent, O’zbekiston (UzDaily.uz) — O‘zbekistonda tashkil etilgan TheCarGo startapi AQSHdagi avtomobil transporti brokerlari uchun mo‘ljallangan AI-platformasini rivojlantirish maqsadida ilk investitsiya raundida $110 000 mablag‘ jalb qildi.

Jalb qilingan investitsiyaning $80 000 qismi Yoshlar Ventures fondi, $10 000 qismi a16z skauti Yasin Ehsan hamda $20 000 qismi mahalliy angel investor tomonidan taqdim etildi. 

TheCarGo avtomobil egalari, tashuvchilar va brokerlar o‘rtasidagi jarayonlarni yagona platformada boshqarishga yordam beruvchi raqamli yechimni ishlab chiqmoqda. Shuningdek, kompaniya qo‘ng‘iroqlarni amalga oshirish va qabul qilish, xabarlarga javob berish hamda tashuvchilarni bron qilish jarayonlarini avtomatlashtiruvchi AI-agentlar ustida ishlamoqda.

Startap asoschisi va CEOsi Ziyobek Turdiyev ushbu mahsulot g‘oyasiga AQSH avtomobil logistika sohasidagi ko‘p yillik tajribasi asosida kelgan. U faoliyatini broker sifatida boshlagan, keyinchalik AQSHdagi ikkita avtomobil tashish kompaniyasiga rahbarlik qilgan va sohada uchraydigan murakkab hamda qo‘lda bajariladigan jarayonlarni yaqindan kuzatgan. Loyihaning texnik rivojlanishiga hamasoschi va CTO Baxtiyor Ergashev rahbarlik qilmoqda. 

TheCarGo ilk to‘lov qiluvchi mijozini 2025-yil mart oyida qo‘lga kiritdi. Bugungi kunda platformadan AQSHdagi 10 ta brokerlik kompaniyasi foydalanmoqda. Yechim avtomobil logistika sanoatida keng qo‘llaniladigan Central Dispatch va Super Dispatch tizimlari bilan integratsiyalashgan. Bundan tashqari, startap AI ovozli agentlarini rivojlantirish uchun AWS tomonidan taqdim etilgan bulutli kreditlar va ElevenLabs grantiga ega bo‘lgan.

Jalb qilingan mablag‘lar mahsulotni rivojlantirish, ilk AI-agentlarni ishga tushirish, yangi mijozlarni qo‘llab-quvvatlash hamda jamoani kengaytirishga yo‘naltiriladi. Kompaniya, shuningdek, yaqin 6–8 oy ichida AQSH bozorida faoliyatini kengaytirish uchun navbatdagi investitsiya raundini ochishni rejalashtirmoqda.

“Biz O‘zbekistonda yaratilgan texnologik kompaniya dunyoning eng talabchan bozorlaridan birida muvaffaqiyat qozona olishini namoyish etmoqchimiz. AI-agentlar yordamida brokerlarning kundalik operatsion jarayonlarini avtomatlashtirib, ularga yanada samarali ishlash va tezroq o‘sish imkonini yaratamiz”, — deydi TheCarGo asoschisi va CEOsi Ziyobek Turdiyev.

TheCarGo xalqaro bozorlar uchun mahsulot yaratayotgan O‘zbekistonlik startaplarning yangi avlodiga mansub bo‘lib, mahalliy iste’dod va global ambitsiyalar uyg‘unligining yorqin namunasidir. Ushbu investitsiya raundi mamlakat startap ekotizimiga bo‘lgan investorlar ishonchi ortib borayotganini yana bir bor tasdiqlaydi.