Narbaeva Felipe Paulyer bilan yoshlar siyosati haqida suhbatlashdi
Toshkent, O’zbekiston (UzDaily.uz) — Parlamentlararo Ittifoq Yosh parlament aʼzolarining XII global konferensiyasi doirasida Oliy Majlis Senati Raisi Tanzila Narbayeva BMT Bosh kotibining Yoshlar masalalari bo‘yicha yordamchisi, BMT Yoshlar byurosi rahbari Felipe Paulyer bilan uchrashuv o‘tkazdi.
Uchrashuvda yoshlar siyosati sohasidagi hamkorlikni yanada rivojlantirish, qaror qabul qilish jarayonlarida yoshlarning ishtirokini kengaytirish va BMT bilan parlament hamkorligini mustahkamlash masalalari muhokama qilindi.
Tomonlar global yoshlar kun tartibini ilgari surish va qaror qabul qilish jarayonlarida yoshlarning mazmunli ishtirokini taʼminlash bo‘yicha birgalikdagi saʼy-harakatlarning ahamiyatini yuqori baholadilar. Taʼkidlanganidek, O‘zbekiston yoshlarga nafaqat davlat tomonidan qo‘llab-quvvatlanadigan shaxs, balki islohotlarning faol ishtirokchisi va davlat siyosatini shakllantirishda muhim hamkor sifatida qaraydi.
Bu borada Oliy Majlis Senati va Qonunchilik palatasi huzuridagi yoshlar parlamentlari faoliyatiga alohida eʼtibor qaratildi. Yoshlar parlamentlari yoshlarga qonun ijodkorligi jarayonlari bilan bevosita tanishish, tashabbuslarni ilgari surish va mamlakatni rivojlantirishning dolzarb masalalarini muhokama qilishda ishtirok etish imkoniyatini yaratadi.
O‘zbekiston Respublikasi Prezidentining Toshkent shahrida Jahon yoshlarining tinchlik sari harakati bosh qarorgohini tashkil etish tashabbusiga alohida eʼtibor qaratildi. Tomonlar ushbu tashabbus targ‘ibotini kuchaytirish va uni turli mamlakatlarning yosh parlament aʼzolari va yoshlar tashkilotlarini jalb qilgan holda amalga oshirishning amaliy mexanizmlarini ko‘rib chiqishdan manfaatdor ekanliklarini bildirdi.
BMTning Yoshlar ishlari bo‘yicha ofisi va yoshlar parlamentlari o‘rtasida tizimli hamkorlik o‘rnatish, O‘zbekiston yoshlarining BMT dasturlari va xalqaro platformalaridagi ishtirokini kengaytirish, shuningdek, iqlim kun tartibi, raqamli transformatsiya va sunʼiy intellektdan masʼuliyatli foydalanish sohalarida qo‘shma tashabbuslarni amalga oshirish ham hamkorlikning istiqbolli yo‘nalishlari sifatida belgilandi.
