Ko‘chmas mulkni texnik inventarizatsiyadan o‘tkazish tartibi belgilandi

Toshkent, O‘zbekiston (UzDaily.uz) — Adliya vazirligi Ko‘chmas mulkni texnik inventarizatsiyadan o‘tkazish tartibi to‘g‘risidagi idoraviy hujjatni davlat ro‘yxatidan o‘tkazdi (ro‘yxat raqami 3843).
 
Mazkur hujjatga ko‘ra: texnik inventarizatsiya ko‘chmas mulkning maydoni, tarkibi, texnik tavsiflari va amaldagi holatini aniqlash hamda uning kadastr yig‘majildini shakllantirish maqsadida amalga oshiriladi;
 
texnik inventarizatsiya Davlat kadastrlari palatasi muhandislari yoki malaka shahodatnomasiga ega kadastr muhandislari tomonidan o‘tkaziladi;
 
texnik inventarizatsiya birlamchi va qayta inventarizatsiya shaklida o‘tkaziladi;
 
texnik inventarizatsiya dastlabki kameral ishlar, dala ishlari va dala ishlaridan keyingi kameral ishlar bosqichlarida amalga oshiriladi;
 
dala ishlari davomida joyiga chiqqan holda ko‘chmas mulkning o‘lchamlari olinadi, konstruktiv elementlari hamda muhandislik-kommunikatsiya tarmoqlari o‘rganiladi;
 
texnik inventarizatsiya natijalari asosida ko‘chmas mulkning umumiy maydoni, foydali maydoni, hajmi hamda boshqa texnik ko‘rsatkichlari aniqlanadi;
 
ko‘chmas mulkning rejalari 1:50, 1:100, 1:150 yoki 1:200 masshtablarda elektron shaklda tayyorlanadi;
 
texnik inventarizatsiya natijalaridan norozi bo‘lgan shaxslar Kadastr agentligiga yoki sudga murojaat qilish huquqiga ega bo‘ladi.
 
Ushbu tartib ko‘chmas mulkka oid maʼlumotlarning aniqligini taʼminlashga xizmat qiladi.