Jizzaxda bazalt zavodi auksionga qo‘yildi
Toshkent, O’zbekiston (UzDaily.uz) — Jizzax viloyatining Forish tumanida bazalt mahsulotlari ishlab chiqarish zavodi savdoga qo‘yildi. Obyektni Majburiy ijro byurosi sotuvga chiqargan. Uning boshlang‘ich narxi 230,526 mlrd so‘mni tashkil etadi. Auksion 21 sentyabr kuni soat 10:00 da o‘tkaziladi. Bu haqda E-auksion maydonchasida maʼlum qilingan.
Obyekt “Egizbuloq” mahallasida joylashgan bo‘lib, tuman maʼmuriy markazi — Bog‘don qo‘rg‘onidan 32 km, Jizzax shahrining shimoli-g‘arbiy qismiga 26,5 km masofada joylashgan. Ochiq maʼlumotlarga ko‘ra, ushbu hududda Bazalt Mega Invest Industrial korxonasi faoliyat yuritadi.
Zavod 14,86 gektar yer maydonini egallagan. Hududda umumiy maydoni 4631 kvadrat metr bo‘lgan bir qavatli ishlab chiqarish binosi mavjud. Shundan 4304 kvadrat metr foydali maydon hisoblanadi. Obyekt suv, elektr energiyasi va kanalizatsiya tizimlari bilan taʼminlangan.
Lot tarkibiga nafaqat ko‘chmas mulk, balki ishlab chiqarish uskunalari ham kiritilgan. Xaridorga bazaltni eritish uchun mo‘ljallangan BNV-450 rusumli yettita pech, shuningdek, uzluksiz bazalt tolasi ishlab chiqarish uchun uchta uskuna to‘plami taklif etilmoqda.
Sotuv 2025 yil avgust oyida Forish tumanlararo fuqarolik ishlari bo‘yicha sudi tomonidan chiqarilgan qaror asosida amalga oshirilmoqda. Auksion materiallarida ijro hujjati raqami №4−1305−2401/2209 sifatida ko‘rsatilgan.
Ayni paytda obyektga ikki tomondan taqiq qo‘yilgan — Majburiy ijro byurosi va bank tomonidan.
Bu Majburiy ijro byurosi joriy yilda Forish tumanida savdoga chiqargan birinchi bazalt zavodi emas. May oyida idora Goldfiber Pro korxonasini ham auksionga qo‘ygan edi. Uning baholangan qiymati 802,87 mlrd so‘mni tashkil etgan.
