O‘zbekiston eksporti yetti oyda 17,1 mlrd dollarga yetdi
Toshkent, O’zbekiston (UzDaily.uz) — O‘zbekiston eksporti 2026 yil yanvar–iyul oylarida 17,1 mlrd dollarga yetdi. Bu o‘tgan yilning shu davridagi ko‘rsatkichning 132 foizini tashkil etdi. Yetti oy davomida mamlakat mahsulotlari 120 ta davlatga eksport qilindi va o‘zbek eksportchilari beshta yangi bozorga kirib bordi. Bu haqda O‘zbekiston Investitsiyalar, sanoat va savdo vazirligi xabar berdi.
Eksport uchun yangi yo‘nalishlar qatoriga Sudan, Zimbabve, Kambodja, Gonduras va Mavrikiy qo‘shildi.
Eksport o‘sishiga asosiy hissani to‘qimachilik va meva-sabzavot mahsulotlari, zargarlik buyumlari, qurilish materiallari, oziq-ovqat hamda elektrotexnika mahsulotlari yetkazib berish hajmining oshishi qo‘shdi.
Shu bilan birga, Investitsiyalar, sanoat va savdo vazirligi tegishli tuzilmalar bilan hamkorlikda mahalliy eksportchilarni qo‘llab-quvvatlash va o‘zbek mahsulotlarini xorijiy bozorlarda ilgari surish ishlarini davom ettirmoqda.
Yetti oy davomida Savdoni rag‘batlantirish jamg‘armasi mablag‘lari hisobidan 1141 ta tadbirkorlik subyektiga moliyaviy ko‘mak ko‘rsatildi. Eksportoldi moliyalashtirishi doirasida 113 ta korxonaga 136,5 mln dollar ajratildi. Buning natijasida 1,53 mlrd dollarlik mahsulot yetkazib berish taʼminlandi.
Eksport faoliyati davomida tadbirkorlar duch kelayotgan muammolarni hal etish ham ishning muhim yo‘nalishlaridan biri bo‘lib qolmoqda. Yanvar–iyul oylarida eksport shtablari biznes vakillarining 3044 ta murojaatini ko‘rib chiqdi. Ularning 2547 tasi yoki umumiy murojaatlarning 84 foizi ijobiy hal etildi.
Investitsiyalar, sanoat va savdo vazirligi eksport geografiyasini kengaytirish, yuqori qo‘shilgan qiymatga ega mahsulotlar eksportini oshirish hamda biznesni davlat tomonidan qo‘llab-quvvatlash mexanizmlarini takomillashtirish bo‘yicha ishlarni davom ettirmoqda.
