Toshkentda islom sivilizatsiyasiga bag‘ishlangan mediaforum boshlandi

Toshkent, O’zbekiston (UzDaily.uz) — Toshkentda 25 avgust kuni «Islom sivilizatsiyasi: yangi nigoh, yangi kashfiyotlar» xalqaro mediaforum o‘z ishini boshladi. Tadbirning asosiy qismi O‘zbekistondagi Islom sivilizatsiyasi markazida o‘tkazilmoqda. Unda xorijiy ommaviy axborot vositalari vakillari, xalqaro ekspertlar hamda media sohasi mutaxassislari ishtirok etmoqda.

Forum dasturi tantanali ochilish, yalpi majlislar, tematik media ko‘rgazmalari, matbuot brifinglari va ikki tomonlama uchrashuvlarni o‘z ichiga oladi. Ishtirokchilar xalqaro media loyihalarini rivojlantirish, zamonaviy texnologiyalar, hujjatli filmlar yaratish va tarixiy xotira, shuningdek, nashriyot tashabbuslarini muhokama qiladilar.

Yalpi majlislar va taqdimotlar Islom sivilizatsiyasining jahon ilm-fani va madaniyati rivojiga qo‘shgan hissasi, taniqli olimlar merosi va Qurʼoni Karim, shuningdek, zamonaviy media formatlari va yangi xalqaro tashabbuslarga bag‘ishlangan.

Forumning asosiy xalqaro axborot hamkorlari sifatida Euronews va CNN media brendlari ishtirok etmoqda. Tashkilotchilar ularning ishtirokini tadbirning xalqaro ko‘lami va mediyaviy ahamiyatini kuchaytiruvchi omil sifatida baholamoqda.

Forum doirasida tarixiy va madaniy merosni yoritishga zamonaviy yondashuvlarga bag‘ishlangan mavzuli tadbirlar ham o‘tkazilmoqda.

Forum zamonaviy media yondashuvlar va yangi axborot loyihalari orqali O‘zbekistonning sivilizatsion merosini jahon auditoriyasiga taqdim etish uchun xalqaro maydonga aylanishi kutilmoqda.