Baxtiyor Saidov Singapurda diplomatik munosabatlarning 30 yilligi va ASEAN bilan hamkorlikni muhokama qildi
Baxtiyor Saidov Singapurda diplomatik munosabatlarning 30 yilligi va ASEAN bilan hamkorlikni muhokama qildi
Toshkent, O’zbekiston (UzDaily.uz) — O‘zbekiston Respublikasi tashqi ishlar vaziri Baxtiyor Saidov Singapurda Singapur Respublikasi tashqi ishlar vaziri Vivian Balakrishnan bilan samimiy va mazmunli muzokaralar o‘tkazdi.
O‘zbekiston tashqi siyosat idorasi rahbari mamlakat delegatsiyasiga ko‘rsatilgan samimiy qabul va mehmondo‘stlik uchun Singapur tomoniga chuqur minnatdorlik bildirdi.
Uchrashuv davomida diplomatlar Toshkent va Singapur o‘rtasidagi ikki tomonlama munosabatlar izchil va ishonchli tarzda mustahkamlanib borayotganini mamnuniyat bilan qayd etdilar. Davlatlar o‘rtasidagi hamkorlik o‘zaro hurmat, ishonch va strategik manfaatlar mushtarakligiga asoslangan mustahkam poydevor ustida rivojlanmoqda.
Muzokaralarning muhim qismi savdo-iqtisodiy va investitsiyaviy hamkorlik masa.lalariga bag‘ishlandi. Tomonlar kooperatsiyani kengaytirish, ikki mamlakat ishbilarmon doiralari o‘rtasida to‘g‘ridan-to‘g‘ri aloqalarni rag‘batlantirish, shuningdek, O‘zbekiston bozorida qo‘shma yuqori texnologiyali loyihalar sonini bosqichma-bosqich ko‘paytirish istiqbollarini batafsil muhokama qildilar.
Tashqi ishlar vazirlari yuqori darajadagi muloqotning jadal surʼatini saqlab qolish va uni mazmunan boyitish masalasiga alohida eʼtibor qaratdilar. Shu nuqtai nazardan diplomatlar turli darajadagi bo‘lajak tashriflar jadvalini ko‘rib chiqib, 2027 yilda nishonlanadigan O‘zbekiston va Singapur o‘rtasida diplomatik munosabatlar o‘rnatilganining 30 yilligi munosabati bilan o‘tkaziladigan tadbirlar dasturini shakllantirish ishlarini boshladilar.
Shuningdek, Baxtiyor Saidov va Vivian Balakrishnan mintaqaviy hamda xalqaro kun tartibidagi dolzarb masalalar yuzasidan fikr almashdilar. O‘zbekiston tashqi ishlar vaziri Toshkentning Markaziy va Janubi-Sharqiy Osiyo o‘rtasidagi ko‘p qirrali muloqotni kengaytirish, ASEAN bilan amaliy hamkorlikni faollashtirish hamda ko‘p tomonlama diplomatiya institutlari doirasida sheriklik aloqalarini yana-da chuqurlashtirishdan manfaatdor ekanini taʼkidladi.
