AQSHda noqonuniy ko‘cha poygalari ishtirokchilari ushlandi

Toshkent, O‘zbekiston (UzDaily.uz) — AQSHning Ogayo shtati janubi-g‘arbida joylashgan Sinsinnati shahrida noqonuniy ko‘cha poygalarida ishtirok etganlikda ayblanayotgan shaxslar, jumladan O‘zbekistondan chiqqan fuqarolar ushlandi. Bu haqda Amerika ommaviy axborot vositalari xabar bermoqda.

Manbalar maʼlumotiga ko‘ra, bir guruh yoshlar drift bilan shug‘ullangan va Paycor stadioni hududida xavfli avtomobil tryuklarini bajargan.

Voqealarni kuzatish uchun politsiya drondan foydalangan. Bu esa chiqish yo‘llarini yopish va olti nafar shaxsni qo‘lga olish imkonini bergan.

Ushlanganlarga hududga noqonuniy kirish bo‘yicha ayblovlar qo‘yilgan. Ishtirokchilardan biriga qo‘shimcha ravishda noqonuniy poygalarni tashkil etish yoki ularda qatnashish bo‘yicha ham ayblov eʼlon qilingan.

Sud har bir ayblov epizodi bo‘yicha 2500 AQSH dollari miqdorida garov belgiladi.

Tergov doirasida politsiya Audi, BMW, Ford Mustang va Dodge Challenger rusumli avtomobillarni ham jarima maydoniga evakuatsiya qildi.