Тошкент, Ўзбекистон (UzDaily.uz) — Тошкентда умуммиллий «Яшил макон» лойиҳаси доирасида 16,6 млн туп бута қаламчалари экилди. Жами пойтахтда камида 120 млн туп бута етиштириш режалаштирилган. Бунинг учун шаҳарнинг 12 та туманининг ҳар бирида 10 млн тупдан бута кўчатлари парваришланади.
Ташаббус Тошкент шаҳар ҳокимлиги ташаббуси билан амалга оширилмоқда. Унинг мақсади кўчат экиш материалларини маҳаллий шароитда етиштиришни йўлга қўйиш, импортга қарамликни камайтириш ва тайёр кўчатларни харид қилиш харажатларини қисқартиришдан иборат.
Ишлар Бектемир туманида бошланган, кейинчалик пойтахтнинг барча туманларини қамраб олган. Ҳокимлик маълумотларига кўра, лойиҳага 2 500 нафардан ортиқ ходим ва қарийб 100 та махсус техника жалб қилинган.
Бута кўчатларини етиштириш учун 31,4 гектар ер майдони тайёрланган. Шундан 3,8 гектарида иссиқхоналар учун ёйсимон конструкциялар ўрнатилиб, плёнкали қопламалар тортилган. Навбатдаги экиш босқичини ўтказиш учун ҳам 3,7 млн туп қаламча тайёрлаб қўйилган.
Лойиҳани амалга ошириш пойтахтни маҳаллий кўчат экиш материаллари билан таъминлаш, яшил ҳудудларни кенгайтириш ва шаҳарнинг экологик барқарорлигини мустаҳкамлашга қаратилган.
Ҳокимликда кўчатларни маҳаллий шароитда етиштиришни ривожлантириш Тошкентни изчил кўкаламзорлаштириш ва шаҳар микромуҳитини яхшилашга хизмат қилади, деб ҳисобланмоқда.
