Xalqaro investorlar O‘zbekiston moliya bozorini o‘rgandi
Toshkent, O’zbekiston (UzDaily.uz) — Yirik xalqaro institutsional investorlar vakillari O‘zbekiston Iqtisodiyot va moliya vazirligi bilan mamlakat ichki moliya bozorida ishlash istiqbollarini muhokama qildi.
Vazir maslahatchisi Jasur Qarshiboyev bilan uchrashuv 4 sentyabr kuni bo‘lib o‘tdi.
Muzokaralarda Finlyandiya Davlat pensiya jamg‘armasi, Ilmarinen, Elo va Veritas pensiya hamda sug‘urta kompaniyalari, shuningdek, SOKA-BAU va Aktia Bank Oyj vakillari ishtirok etdi.
Uchrashuvning asosiy mavzularidan biri xorijiy investorlarni O‘zbekiston davlat g‘aznachilik obligatsiyalari bozoriga jalb qilish imkoniyati bo‘ldi. Xorijiy tomon ushbu segmentga chiqishdan manfaatdor ekanini bildirdi. Shundan so‘ng ishtirokchilar ichki moliya bozorining salohiyati va uni yana-da rivojlantirish masalalarini muhokama qildi.
Iqtisodiyot va moliya vazirligi vakillari O‘zbekiston iqtisodiyotining joriy holati, tarkibiy o‘zgarishlar va amalga oshirilayotgan iqtisodiy islohotlar haqida maʼlumot berdi. Shuningdek, mamlakatni kelgusida rivojlantirish istiqbollari haqida fikr bildirildi.
Xalqaro investorlar amalga oshirilayotgan o‘zgarishlar, ichki moliya bozorini shakllantirish va rivojlantirish bo‘yicha ko‘rilayotgan chora-tadbirlarni ijobiy baholadi.
Uchrashuvda mamlakatning kredit profilini mustahkamlash masalalariga alohida eʼtibor qaratildi. Tomonlar O‘zbekistonning suveren kredit reytingini yana-da oshirish va investitsion darajaga erishish istiqbollarini ko‘rib chiqdi.
Bundan tashqari, ishtirokchilar davlat qarzini boshqarish yondashuvlari, milliy valyutada moliyalashtirishni jalb qilish imkoniyatlarini kengaytirish va ichki kapital bozorini yana-da rivojlantirish masalalarini muhokama qildi.
Iqtisodiyot va moliya vazirligida taʼkidlanishicha, xalqaro institutsional investorlar bilan hamkorlik moliya bozorining joriy imkoniyatlarinigina emas, balki uni yana-da rivojlantirish masalalarini ham qamrab oladi.
