Toshkentda maktab o‘quvchisini bilaguzuk yutishga majburlashgan

Toshkent, O’zbekiston (UzDaily.uz) — Toshkentda Yashnobod tumanidagi 151-maktabning uchinchi sinf o‘quvchisi onasining aytishicha, ikki nafar maktab o‘quvchisi uni zo‘rlik bilan metall magnitli bilaguzukni yutishga majbur qilganidan so‘ng reanimatsiyaga yotqizildi.

Bolalar ombudsmani va huquqni muhofaza qiluvchi organlar voqea tafsilotlarini tekshirmoqda. Bu haqda Bolalar ombudsmani xabar berdi.

Bolaning onasi so‘zlariga ko‘ra, voqea maktab hojatxonasi yaqinida sodir bo‘lgan. Uning oldiga ikki nafar o‘quvchi kelgan, biroq ayol ularni aniqlay olmagan. Ular bolaga zo‘ravonlik qilish bilan tahdid qilib, uning qarshiligiga qaramay, metall bilaguzukni og‘ziga solib, yutishga majbur qilgan.

O‘quvchi unga jabr yetkazganlardan qo‘rqqani sababli sodir bo‘lgan voqea haqida ota-onasiga darhol aytmagan. Kuchli og‘riqlar paydo bo‘lganidan so‘ng u shifoxonaga olib borilgan. Rentgen tekshiruvi vaqtida shifokorlar metall buyumni aniqlagan. Shundan keyin bola maktabda yuz bergan voqea haqida so‘zlab bergan.

Onasining aytishicha, bilaguzuk bolaning organizmida bir necha qismga bo‘linib ketgan va oksidlana boshlagan. Shifokorlar qariyb uch soat davom etgan shoshilinch operatsiya o‘tkazgan. Yot jism ichakni olti joyidan shikastlagani sababli shifokorlar zararlangan qismning qariyb besh santimetrini olib tashlashga majbur bo‘lgan.

Jarrohlik amaliyotidan so‘ng bola reanimatsiyaga o‘tkazilgan. Onasi so‘zlariga ko‘ra, shifokorlar uning reanimatsiyada yana to‘rt-besh kun qolishini taxmin qilmoqda. Shu bilan birga, poytaxt Maktabgacha va maktab taʼlimi boshqarmasi bolaning ahvoli qoniqarli ekanini va unga zarur tibbiy yordam ko‘rsatilayotganini maʼlum qildi.

O‘quvchining onasi voqea haqida ijtimoiy tarmoqlarda video murojaat eʼlon qilib, xabar berdi. U ota-onalarni bolalar o‘rtasidagi shafqatsizlik va tarbiya masalasiga eʼtibor qaratishga chaqirdi. Ayol, shuningdek, sodir bo‘lgan voqeadan keyin shok holatida ekanini va farzandidan ayrilib qolishiga sal qolganini aytdi.

Bolalar ombudsmani voqea sodir bo‘lganini tasdiqladi. Idora vakillari maktabga borib, voqea tafsilotlarini bevosita joyida o‘rganmoqda. Vaziyat alohida nazoratga olingan.

Tekshiruv doirasida, jumladan, o‘quvchilar xavfsizligini taʼminlash va bola huquqlari buzilgan bo‘lishi ehtimoli bilan bog‘liq masalalar ko‘rib chiqilmoqda. Bolalar ombudsmani barcha holatlarga oydinlik kiritilishi va zarur choralar ko‘rilishiga qadar vaziyatni kuzatib boradi.

Voqea yuzasidan tuman ichki ishlar boshqarmasi tomonidan tergovga qadar tekshiruv olib borilmoqda. Qo‘shimcha maʼlumotlar tekshiruv natijalariga ko‘ra taqdim etiladi.