Toshkentda BRTning 1,2 kmlik uchastka qurilishi yakunlanmoqda
Toshkent, O’zbekiston (UzDaily.uz) — Toshkentda Shahrisabz ko‘chasining 1,2 kilometrlik qismida BRT tizimi uchun avtobuslarga mo‘ljallangan alohida yo‘lak qurilishi davom etmoqda. Ushbu uchastkada qurilish-taʼmirlash ishlarini 2026 yil 31 avgustga qadar yakunlash va shundan so‘ng yo‘lni harakat uchun ochish rejalashtirilgan. Bu haqda Toshkent shahar Transport va yo‘l infratuzilmasi bosh boshqarmasi huzuridagi Yo‘l harakatini tashkil etish markazi xabar berdi.
Loyiha doirasida jamoat transporti uchun asosiy qatnov qismidan bordyurlar bilan jismoniy ajratilgan alohida yo‘lak tashkil etilmoqda. Unda katta sig‘imli avtobuslar muntazam harakatlanadi. Shu sababli yo‘l asosi doimiy va yuqori intensivlikdagi yuklamalarni hisobga olgan holda qayta qurilmoqda.
Ishlar davomida tuproq ikki metrdan ortiq chuqurlikda olib tashlanmoqda. Quruvchilar, shuningdek, tuproq holati va namlik taʼsiri bilan bog‘liq muammolarni bartaraf etmoqda. Asosning barqarorligini oshirish va uning yuqori qatlamlarini namlik taʼsiridan himoya qilish uchun geotekstil materiallaridan foydalanilmoqda.
Bunday konstruksiya yo‘l qoplamasi ostida suv to‘planishining oldini olishi, tuproq siljishi va cho‘kishi xavfini kamaytirishi hamda og‘ir avtobuslarning muntazam harakatiga bardosh beradigan asosni taʼminlashi kerak. Bu qoplamaning deformatsiyalanishi va cho‘kish ehtimolini kamaytirishi kutilmoqda.
Yo‘l konstruksiyasini loyihalashda Toshkentda ekspluatatsiya qilinayotgan avtobuslarning texnik xususiyatlari va og‘irligi, ushbu yo‘nalishdagi kunlik qatnovlar soni hamda yo‘lga tushadigan doimiy yuklama hisobga olingan.
Uchastkada BRT talablariga mos beshta avtobus bekatini jihozlash rejalashtirilgan. Alohida yo‘lak umumiy transport oqimidan ajratiladi. Bu avtobuslarning umumiy qatnov qismiga chiqishi, boshqa transport vositalarining esa avtobuslar uchun mo‘ljallangan yo‘lakka kirishining oldini olishi kerak.
Hozirda Shahrisabz ko‘chasida yo‘l asosini tayyorlash va mustahkamlash, shuningdek, BRT infratuzilmasini barpo etish ishlari davom etmoqda.
Ushbu uchastka Shahrisabz ko‘chasida BRT loyihasini amalga oshirishning birinchi bosqichi bo‘ladi. Keyingi bosqichlarda alohida avtobus yo‘lagini yana-da uzaytirish rejalashtirilgan.
