Toshkentda 15 avto ishtirokida YTH: haydovchi shifoxonaga olindi

Toshkent, O‘zbekiston (UzDaily.uz) — Toshkentda 15 ta avtomobil ishtirokida ommaviy yo‘l-transport hodisasi sodir bo‘ldi, ulardan birining haydovchisi shifoxonaga yotqizildi. Hodisa seshanba kuni soat taxminan 16:25 da “Chimyon” savdo-ko‘ngilochar markazi hududida yuz bergan.

O‘zbekiston IIV Yo‘l harakati xavfsizligi xizmati maʼlumotlariga ko‘ra, 73 yoshli haydovchi boshqaruvidagi Chevrolet Equinox avtomobili yuqori tezlikda svetoforning qizil chirog‘ida to‘xtab turgan mashinalar qatoriga kelib urilgan.

Ijtimoiy tarmoqlarda tarqalgan videolarga ko‘ra, zarba taʼsirida havoga ko‘tarilib, so‘ng boshqa avtomobillar ustiga qulagan. To‘qnashuv natijasida mashinalardan biri yo‘l chetidan chiqib ketib, daraxtga urilgan.

Hodisa guvohlari zararlangan avtomobil ichida qisilib qolgan haydovchiga yordam ko‘rsatishga harakat qilgan. Keyinchalik voqea joyiga qutqaruv xizmatlari yetib kelgan.

Avtomobil haydovchisi jarohatlar bilan tibbiyot muassasasiga olib ketilgan. Dastlabki maʼlumotlarga ko‘ra, YTHga uning sog‘ligi to‘satdan yomonlashib, boshqaruvni yo‘qotgani sabab bo‘lgan bo‘lishi mumkin.

Hozircha boshqa jabrlanganlar haqida maʼlumot berilmagan.